يبكيك شعبك

علم وصلني زود القلب باحزان
عز الله انه جاب لي النكايد
الحزن شيد داخل القلب بنيان
والنفس عافت لينات الوسايد
لولا الرضا باللي كتب عالم الشان
اللي بحكمه نرتضي ما نحايد
لهل دمع العين في كل الازمان
لكن ما من دمع الاعيان فايد
مرحوم يا شيخ له الطيب عنوان
يا من تقلد للشهامة قلايد
يا لله عسا الفردوس للفهد مسكان
وعساه في جنة بها الخير زايد
اللي خدم للدين في كل الاوطان
حاكم سياسي فذ قايد ورايد
اللي بحكمه جالنا فالملا شان
وسدنا بفضل الله على كل سايد
يبكيك شعبك من شباب وشيبان
وتبكيك دارك من قريب وبعايد
وتبكيك كل العرب من كل الاركان
والعالم بأسره به الحزن زايد
واليوم يوم الامر ما عنه نكران
الحمد لله ما رضينا الزهايد
ما دامنا في دار ذربين الايمان
قايد يروح ويخلفه خير قايد
ما دام ابو متعب ذرانا وسلطان
الصالحين الطيبين الولايد
الروس مرفوعة ولا فيه خذلان
نمشي بامان ونفتخر بالعوايد
مبايعينك يابو متعب بالاحسان
ونكيد من حاول عليكم يكايد
حنا معك لو كان بالكون ما كان
ازهم وتلقى لك عضود وسنايد
منصور بادي المطيري
بريدة