الرضاء بالقضاء المحتوم

قال من يثني الهامه لربه خضوع
جل شان الكريم اللي بيده الاجل
الرضاء بالقضاء المحتوم وقت الوقوع
سنة المصطفى اللي ما عليها جدل
هاجس الشعر صار لنار حزني ولوع
حين أذاعوا خبر فهد الفهود ارتحل
يا عيون الوفاء جودي بزرق الدموع
خلي الدمع فوق الخد مثل الهلل
أجهدي بالعيون وزوعي الدمع زوع
لا تخلين شي ما ينوشه بلل
لا تغالين دمعك بالشهر والسبوع
الفقيده عظيمه والمصيبه جلل
مات باني حضارتنا زعيم الجموع
مات فهد العروبه مات فهد البطل
مات رمز التضامن عن جميع الصدوع
جامع شمل الامه لا يصيبه شلل
وبعد فقده يلوعه الأمه الهم لوع
مثل لوع العواصف في سفوح الجبل
خيم الهم واطفأ الحزن نور الشموع
وهزت الفاجعه معنا جميع الدول
تذرف العين دمعتها وقلب جزوع
ودورة الوقت مكرتها تفر بعجل
الفهد قايد الأمه تجاه الطلوع
خادم البيت والإسلام عنا رحل
أحسن الله عزانا في شريف الطبوع
طيب الذات والسيره مداو العلل
وبارك الله ببيعتنا نهار الربوع
وبارك الله بمن شال الحمل واحتمل
ويحفظ الله لنا أصل الوفاء والفروع
قادة قادوا الامة بحكم عدل
أبو متعب ولد عبدالعزيز البتوع
طيب الساس والمنهج عريب الأصل
ونايبه طايل بوعه على كل بوع
بالسياسه يحلل محكمات الحيل
نبتهل بالسجود ونبتهل بالركوع
يحفظ املوكنا من كل شر وزلل
تم قولي ولله البقاء والرجوع
وجل شان الكريم اللي بيده الأجل