صوت وصدى

الصوت: للشاعر هزاع الحمادي من الشمال وتحديداً من «صوير» مدينة الشعر وارض الخير وهذه الدعوة الشمالية عبر هذه القصيدة المعبرة المليئة بالحكم والبساطة القصيدة موجهة للزميل الشاعر صبار بن عابر العنزي:
ارجوك ياصبار يا موفق الخير
اطلبك واقوالي عليك استماعه
توافق على المسيار ومعك مسايير
انت تعرفهم من كبار الجماعه
وحياة من صورك بالرحم تصوير
وحدد اجلك ورزقتك وانقطاعه
مالي مقاصد بالشقا والدنانير
عن المصالح مغنيتنا القناعه
رزقي على اللي يرزق الذيب والطير
ماله معاش ولا يسوق بضاعه
شفي مجالس طايلين الاشابير
نضحك مع الاصحاب بالعمر ساعه
العمر يفني والليالي مدابير
تراه عن العرش مثل الوداعه
متى تحدد رحلتك لأهل صوير
تاج الشرف والعز نبني شراعه
يا محرر الاشعار بيديك تحرير
فكرك عن الزلات عنده مناعه
نكن لك بالقلب حبٍ وتقدير
حبٍ حقيقي ما يصنع صناعه
والعذر من الابيات وعن كل تقصير
الكامل الله بالوفاء والشفاعه
الصدى: لزميلنا صبار العنزي فيه من المعاني ورد الثناء لأهله وقبول الدعوة بشرط تبادل الزيارات انها الاخلاق العربية تتمثل في مجموعة القيم في هذين النصين:
هات القلم نكتب جميل التعابير
ابيات شعرٍ صغتها في وقاعه
اقولها ماهي تسلف من الغير
نظم الضمير وفيض عذب اندفاعه
ابيات باللي ما يهاب المخاسير
هزاع ابو ممدوح جزله اطباعه
الوايلي بالطيب فاق المعايير
يطلب زيارتنا وحنا اذراعه
حنا نتشرف بالرجال المشاهير
والحر مثلك شاقنا بارتفاعه
اجيك مع ربعن وجيهن مسافير
واومرك ياشيخ عندي مطاعه
يالقرم شخصك من رجالن مناعير
وانت جمعت المرجله والشجاعه
من ساس قوم بالملاقا مساطير
امجادهم ماهي دعاوي واشاعه
ماهيب قول وهرج حماية البير
تاريخكم راسي وصعب اقتلاعه
ومني لبو ممدوح ريف الخطاطير
عز الذي ضامة زمانه ولاعه
عهدٍ نجيلك مع طلوع النواوير
موعد وموعد منك نبقى سماعة