الفاجعة

أطيح ثم اقوم وأطيح واقوم
من هول ماصاب القلوب المريعه
الفاجعة لامات سيّد مْن القوم
تضيق سجّات الفجوج الوسيعه
والفاجعة لامات بالناس زيزوم
حرٍ مثل (نايف) رجومه رفيعه
وانا تقل بين المخاليق منجوم
ماعاد اميّز والفواجع هَزيعه
من يوم راح اللي للاضداد شغموم
عَطب الضّرايب فوق ماذب ريعه
له هدةٍ وقت اللقاء عالي الحوم
مْقدام ماخاف الحصون المنيعه
كم مرّغ خشومٍ وكم كسّر خشوم
سم العدا الضرغام درع الشريعه
جفف ينابيع الضلاله وبالكوم
وبامر الله أخمد كارثاتٍ شنيعه
سيف الوغى في جنة الخلد مرحوم
يالله عسى قبره رحيقٍ ربيعه
عبدالرحمن بن محمد الفاضل