مساء اليوم انطلاق فعاليات مهرجان الرياض للتسوق والترفيه بأوبريت (تراحيب الرياض)!!

من كلمات ناصر القحطاني وألحان وغناء خالد عبدالرحمن

تحت رعاية صاحب السمو الملكي الأمير سلمان بن عبدالعزيز أمير منطقة الرياض وعلى استاد الأمير فيصل بن فهد بالملز تنطلق مساء هذا اليوم فعاليات مهرجان الرياض للتسوق والترفيه وسيكون الافتتاح بأوبريت (تراحيب الرياض) من كلمات الشاعر ناصر القحطاني وألحان وغناء الفنان خالد عبدالرحمن بحيث يأتي الأوبريت بالتناوب بين الفنان والشاعر على شكل الدويتو، وسيبث على القناة السعودية الأولى بعض القنوات الأخرى، حيث تكون البداية بمقطع شعري يلقيه القحطاني ثم تتوالى اللوحات المؤداة بين الفنان خالد عبدالرحمن والشاعر، بحيث يغني خالد في كل لوحة مع نزول فرقة قادمة من إحدى مناطق المملكة إلى ان تكتمل الفرق المشاركة كأنها تأتي للرياض والرياض تفتح أذرعها مرحبة بها بفرقة العرضة النجدية قبل النزول لأرضية الميدان.
وسيشارك في هذا الأوبريت (4) فرق شعبية من جميع مناطق المملكة، كذلك سيتواجد في مسرح الأوبريت (70) راقصاً و(60) طالباً من صغار السن، وسيكون العمل في (5) لوحات هي كالتالي..
اللوحة الأولى: تبدأ بالحديث عن نشأة الرياض منذ ان كانت حصناً وبوابات صغيرة حتى أصبحت مدينة تضاهي أكبر مدن العالم تطوراً وحضارة يراعى في ذلك الامتداد التاريخي ومراحل نموها.
اللوحة الثانية: يتم التركيز فيها على الرياض الآن بحضارتها ومنجزاتها ومعطياتها التي مكنتها من الوقوف شامخة بين عواصم العالم.
اللوحة الثالثة: تتكلم عن جاهزية الرياض لاستقبال الجميع في كل فصول السنة وذلك تأكيد لتزايد وفود الهجرة للعلم والعمل والعلاج والزيارات، وفي هذه اللوحة يكون الربط بين الرياض ومناطق المملكة بقدوم (4) وفود من المناطق الأربع المحيطة بالرياض عبر أهازيج وشيلات تمثل كل منطقة فلكلورياً وتراثياً ويتناوب الفنان والشاعر في ابرازها لتكريس مفهوم السياحة.
اللوحة الرابعة: يركز فيها على الرجال المخلصين الذين صنعوا هذا المجد وأوصلوا هذه المدينة إلى مكانتها المرموقة وعلى رأسهم صاحب السمو الملكي الأمير سلمان بن عبدالعزيز أمير الرياض.
اللوحة الخامسة: وهي الأخيرة وتتمثل في التغزل بالوطن والافصاح عن حبه وتجديد العهد بالذود عنه وتوضح كل ما قدمه هذا الوطن داخلياً وخارجياً من اسهامات على جميع الأصعدة، ويتطرق للرسائل التي قدمها ويقدمها بين الحين والآخر انطلاقاً من العقيدة السمحة وعملاً بارث القيم والمبادئ العربية الأصيلة ووصولاً إلى تفعيل العلاقة مع الأشقاء العرب والمسلمين منفردين بروح التضامن ونبذ الشقاق والفرقة ومواصلين دعوات الاصلاح تحت راية التوحيد لتختتم هذه اللوحة الأخيرة والأوبريت ككل برفع العلم السعودي أمام الجميع.
النص الكامل لأوبريت (تراحيب الرياض):
في زمان الجاهلية.. كان به سورٍ قديم/وكان به ثارٍ عظيم/وكان به حُرٍ عديم
انطلق كن الثرى تحته تقول اعجل تقاض/توه فجوجٍ عراض/وخلفه شدادٍ غلاظ
كانت الرحلة طويلة بس كانت في الصميم/كان به مسرى عتيم/وكان به ليلٍ يتيم
فيه للنخوه رعود وفيه برق العز ناض/بين خطوه وانتهاض/وبين سطوه واعتراض
كانت الأحداث تنبي عن جحيم وعن نعيم/انتهت والله كريم/واعتلى الكرسي زعيم
وبعد ما هانت وكانت نجد في حالة مخاض/كان ميلاد البياض/وكان ميلاد الرياض
قبل حول مية سنة
لين حتى ها السنه
جاء من المجد أعظمه
وجاء من الطيب أحسنه
والبطل عبدالعزيز
هو حديث الألسنه
اشهد ان الحق.. لو يوقف خصيم
ما استطاع يخاصمه
الرواة تسجل امجاد العديم
والأصابع باصمه
من يصدق ان ها السور القديم
يصبح اجمل عاصمه
لا شتات وفرقه ولا عناد ولا اعتراض
تسقط اسوار الجهالات وتعيش الرياض
من زمان الجو غايم والثرى محميّه
والعيون موجّهه للديره الخلاّبه
من بداية قومة الشيخين في الدرعيه
وانتهاء عصر البدع بأمر الولي وكتابه
لين تسليم المربع خامس العيديه
واعتماد الشرع الأوحد بعد شرع الغابه
من مراويح الهبايب حزة العصريه
لا نصت وادي حنيفه واقبلت منسابه
لين ميدان العدل وبداية الحريه
وانتصاف ارض الصفاه لحاجة الطلاّبه
راحت الديره تنادي للحياة الحيه
ولا طرى للطير يشبع غير من مخلابه
حقّقت بكفوف اهلها احلامها الورديه
ما ملوها من جنيهات الذهب جلاّبه
أينعت رغم عن أنف التربه الرمليه
واستمرت وجهٍ ابيض لمعته جذّابه
اشبه بلمعة سيوف العرضه النجدية
الله يعلّي مراتبها مع الكسابه
الرياض ارض التراضي راضيه مرضيه
والحلا الزايد تعدّى السور والبوّابه
تنمو مساحتها وتكبر
مناخها مسك وعنبر
سكانها عشّاق منبر
في كل بيت الله أكبر
ارخت ذوايبها على البر
واصبح لها مظهر ومخبر
يا طيبها في الوقت الاغبر
نحبها والخافي أعبر
جتها الطيور مهاجره
من كل حدب وكل صوب
قلبٍ فتح بوابته
حتى ملك كل القلوب
واللي نوى بوصالها
قامت تسابقه الهبوب
حتى غدت له فاتنه
وأمسى وهو فيها يذوب
أشرقت للعز من طلعة المصمك شموس
واكتشفنا للحضارة قطوف حاليه
من دهاليز الثميري وأحاديث الجلوس
انطلقنا بيد محيي العظام الباليه
والتفتنا للمدن وابتدينا بالدروس
وش نسوي لاجل نملك كنوز غاليه
مالنا الا نجعل من الرياض أحلى عروس
وابتدت خطواتنا الأوله والتاليه
بعد ما هيب اربع ابراج في الوقت العبوس
امتلت من ناطحات السحاب العاليه
ارتدت من ثورة العالم الأول لبوس
بين موج من التحدي وصحرا صاليه
كلما صليتوا العصر يا خفاف النفوس
سيروا للشرق يم الحزوم الخاليه
في وعد خد الثمامه على ذيك الطعوس
علها اللي ترزم رعودها المتواليه
هذي الرياض افتتاح السيره العطره
والهودج اللي تزفه لهفة الصحرا
الله عليها مراية نور منشطره
شطر على كف نجد وشطر في القمرا
تمردت للحياة وجالها بطره
على تضاريسها ورمالها الحمرا
لو ما يجيها من المزنه ولا قطره
بيض قلوب اهلها وفياضها خضرا
ما عندنا الا تراحيب على الفطره
والعود الأزرق خلاف الدله الصفرا
نبرد كبود على العادات منفطره
ونسجل ازهى حضاره والزمن يقرا
يلطف بنا اللي لطف باحوالنا الخطره
والنفط يشرى لكن الطيب ما يشرى
صلوا على ابو فاطمه
جينا نزور العاصمه
الله يكرم وجهها
من اليدين الغاشمه
كانت هي احلى فاتحه
واحلى من احلى خاتمه
نشوفها نجمة سما
بين النجوم الحالمه
بان وجه الرياض الناصع الطاهر
حي فال العيون اللي ربت فينا
بشرتنا عن المستقبل الزاهر
واحتوتنا بعد ما شان ماضينا
وحدها اللي تخطت وضعها القاهر
ولمعت دون لا بحر ولا مينا
نحمد الله بعد تطويرها الباهر
اعتلينا شوامخها وغنينا
جينا على طاري الغلا
للي بها ملح وحلا
نحبها ونعدها
ريمية وسط الفلا
معلقه بأطهر ثرى
ومعلقين بها الملا
الحب واللهفة لها
والطاعه لها والولا
الروح ما بعدها روح
يا نجد تفداك الأرواح
ان مر بك ضيم وجروح
عديه كابوس وانزاح
ننصاك والدرب مفتوح
ونعود والكل مرتاح
كلمة تكفي عن البوح
وشمس تبشر بالاصباح
يا مرحبا بالضيوف اعداد ما ابتل ريق
واعداد ما هب ذاري في المسا والصباح
ترى اسعد ايامنا يوم يجيب الصديق
بهجة نظر للعيون وللصدور انشراح
ترحيب نجد الكرام أم الوهج والبريق
في ديرة كلها افراح وليالي ملاح
تشتاق مع سجة اللي جايها في الطريق
حتى الى سج يذكر عطرها يوم فاح
سلام والبيرق سعودي والأكارم حاضرين
والليله من احلى الليال اللي غلت باثمانها
بانشدك عن رجل خذا بنت وعشقها من سنين
لين كبرت مصيونة العرض وتعلا شانها
يا مرحبا يا صاحبي قدام جمع الطيبين
واحلى السوالف خلها تندار في ميدانها
هذاك شيخ فوق كرسي نجد له وزن ثمين
مصيونة العرض اشهد انه بالعداله صانها
رب الملا لا حب ديره خصها بالطيبين
والشاهد الله نجد قايم حظها بأعيانها
ما كنه الا العارض اللي له شموخ بكل عين
لكن له قلب يشيل الديره وسكانها
المخلص اللي خلفه يقود الرجال المخلصين
لبنه ورا لبنه ايلين استعجلوا بنيانها
انا اشهد انه يوم دللها وزانت حبتين
راحت تزاحم سيدات الحسن باللي زانها
شف نجد عشرات السنين يشيلها بالراحتين
ما كل من تجميل خدتها وكحل اعيانها
ابيض دروب ابيض خفوق ابيض يمين ابيض جبين
أحيان هي نور بصره واحيان هو شريانها
قطع على نفسه عهد واوفى ونفذ له يمين
يوم ان غيره عالم قامت تخون ايمانها
ان جيت قصر الحكم تلقى الليث في وسط العرين
يرعى مصالحها ويرعى الحق في ميزانها
له نظره منها الشرور المستطيره تستكين
وله بسمه منها الدموع تهاجر من اجفانها
يمكن يفارق بعضنا داره ويغلبه الحنين
بس العجب ناس تبادلها الحنين اوطانها
ان زاد حبل الوصل والا ما قصر للزايرين
ما شفتها أميز وردة تختال في بستانها
سلمان نجد أفنى لها عمره وندعي كل حين
الله يخلي نجد ويخلي لنا سلمانها
لا احد يقول الجو صافي ندري انه ما صفا
حنا نمر بمرحله تفرق عن اية مرحله
ان ما تكاتفنا طمع فينا المعادي ما اكتفى
وان ما غدا رص الصفوف ازود غدت متخلخله
يا فاتح البيبان يالحضن المعزز بالدفا
يا موطن من يبغضه قلنا عسى امه تثكله
والله مالك لو تشيب المرضعات الا الوفا
ولا لنا لو ما نجيك الا التسامح والوله
كم من مكان مفلس من نورك اللي ما انطفى
ماضيه ينبي حاضره عن مهزلة مستقبله
الله يثبتنا على دين الحبيب المصطفى
شفيعنا باذن الله ان جات العشار معطله
والله يزيدك عزة تسرف بهراج القفا
تزيد معها كبرياء ويزيد معها بلبله
يا دار باسم الله عليك وكل ما جفنك غفا
خلك قريرة عين ونكرر عليك البسمله
ولا عليك من الصواب اللي مصيره للشفا
ما فيه شي الا قبل ينضج يمر بغربله
يا دار ما به معضله.. عما سلف ربك عفا
الخير بوجيه الرجال اللي تحل المعضله
من بعد ما عم الرخا
والخير وانواع السخا
قدنا التضامن والوفا
قدنا التسامح والاخا
واللي نخانا من بعيد
يبشر بعزه لا انتخى
لا ما خذينا في بعضهم مقالب
نمسك على البارود والورد نهديه
حنا معك يا دار قلب وقالب
لبيه يا اطهر دار في الكون لبيه
وان قام للفتنه ذيول تكالب
العايل اللي ما تربى نربيه
يا سيدنا يا عمنا
يا انفاسنا يا دمنا
نبعد ورا حدك زمن
ونعود لك وتلمنا
مهما انحكى من بيننا
ما همنا ما همنا
يا دار لحم اكتافنا من خيرك
الله يصونك للأبد ويجيرك
ما غيرك الماء والهواء ما غيرك
حنا عيال اخوان من طاع الله
ان كان ما التفت وراك يدينا
جعل العجايز والبني تبكينا
عار علينا كان ما اهتمينا
حنا عيال اخوان من طاع الله
نحيا حياة للردى مفتقره
والا الضعيف ادنى البشر تحتقره
أما غناة الذيب والا فقره
حنا عيال اخوان من طاع الله
يا سعد من حنا عصابة راسه
لا افترت وضاعت عليه الطاسه
ويا حي من شرع الولي نبراسه
حنا عيال اخوان من طاع الله