بيت وصدى

كان بيت الأسبوع المطروح للشاعر سلطان الحبابي من الطائف والذي يقول:
معاً ياهل الترشيد والتوعيه يا رجال
عن الماء وفضله نرشد فلان وفلانه
وقد تجاوب مع البيت كثير من الشعراء وكانت الأصداء..
نصيحة نقدمها لمستقبل الأجيال
عساها تحصل واحد مصغي آذانه
قبل لا يغور الماء وييبس طويل الجال
وتصبح حياة الآدمي ما لها خانه
ووزير المياه اللي ضرب بأروع الأمثال
مع حملة الترشيد كل قرا إعلانه
ابراهيم بن مسمار القحطاني - الرياض
عسى التوعيه تاصل وتتحقق الآمال
وينعم جميع مواطن داخل أوطانه
ونذكر جليل الملك في كل وقت وحال
سبحان الإله مدبر الكون سبحانه
ولا نسرف وننظر لمستقبل الاجيال
ونعلم عسى تعليمنا تثمر أغصانه
محمد بن جلمود الشكره - الدلم
نبا نشد الايدي فوق الايدي على ما قال
وسلطان جاب علوم لا شك مليانه
الاسراف فالما ينكره طيبين الفال
وتأخذ على الجاهل ليا مال ميزانه
نبا نبذل المجهود بالفعل والأقوال
ومن عز عنده شي يتعب على شانه
أحمد راجح العصيمي
ترى المي نعمة ما تقدر ولا بالمال
وثروه عظيمة ياهل العرف وآمانه
عليه اعتماد الناس بعد الولي المتعال
ولولاه ماتت كل هالناس عطشانه
لزوم علينا نقتصد به على أية حال
وعلى كل رجلٍ ينصح أهله وجيرانه
يوسف بن منور الميموني - الرياض
تروح المياه اليوم هدر من الاهمال
واشوف الضماير بعضها اليوم تعبانه
تجيه النصايح والنتيجه بدون افعال
اقول احمد الله نعمة كيف نكرانه
واقول المياه اليوم ثروة ولا تختال
ترى به نفوس كم تمناه شفقانه
محمد بن عبدالعزيز الخنيفر - أشيقر
نبي نرشد الرجال ومربية الأجيال
نبي نقول للتبذير من هو على شانه
ترى الماء من الله نعمة والقراح زلال
ونرشد وكل عاد بصره بورعانه
ترى الماء حياة الكون كله بدون إشكال
وكل قرأ ما قاله الله سبحانه
مسفر بن ثابت القحطاني -سراة عبيدة
ترى الماء من النعمة وصونوه يالأبطال
أما نسمع الله ذاكره وسط قرانه
ترانا ترى ما نعلم الغيب والأحوال
نبي نمنع إهداره ترى هدرته شانه
غلاه أكبر أكبر من ابنوكٍ بها الأموال
ولولاه ما عشنا لنا عيشة زانه
نواف نايف هلال الحزيمي - الجمش
تطول السوالف دوم لاجاء لها مجال
حياة بدونه يا عرب مالها خانه
احد يفتح الصنبور ساعة وانا مهتال
وحد يفتحه فالبيت لاراح ورعانه
ولاينهي الزوجة ولاينهي الجهال
امور يعدلها الولي جل سبحانه
مسعود الحزيمي - الجمش
بيت الأسبوع
كتبه نافع الحربي من الرياض ويقول:
الشارع اللي كله مياه وحفور
من ينشده عن علته وش سببها
نستقبل صدى البيت بثلاثة أبيات فقط على أن تناقش قضية البيت على فاكس 4871070 خزامى الصحارى زاوية بيت وصدى،
كما نرحب بطرح بيت الأسبوع على أن يناقش قضية اجتماعية هادفة تهم المجتمع.