ذود المشاعر

الشعر طير(ن) عنيد وصار له مده
يمر حدب الضلوع ويختفي فيها
القلب وكره وليامنّه شلع رده
والنادره ف الفضاء عينه تراعيها
يبي شعور(ن) على مطلاعه أيحده
حتى يفج الضلوع ومعه يطويها
والفكر ذوقه رفيع ويمه ايشده
والذايقه من فضاء الإبداع يرويها
نداوي الشعر من مثله ومن قده
مخالبه تصقط الجزله وتدميها
ماني مضريه يخلط مزحه وجِده
علامة الجد ف حروفه مواريها
واليوم أبا اعطيه روح الفكر وأهده
وأعطيه حرية(ن) محد(ن) يساويها
كله لجل من تسوق العشق وتمده
في روح وعيون عاشقها ومغليها
تسوق ذود المشاعر سوق وتوده
مع جرهد البيد ترعاها وتحميها
تسوقها في غرور(ن) كل(ن) ايعده
مغرورة(ن) ف أول الدنيا وتاليها
تحدى حداها وتاقف قدمها نِده
ولسيرة المجد والتاريخ تدعيها
كم من عزيز(ن) بغاها صعّرت خده
هام ف هواها وتكبّر لجل يرضيها
مايدري أنه مجرد معجب أتعده
ما كل الأزوال تعجبها وتغريها
أليا أدبرت طرفها للخلف ما تلده
زعامة القوم مبدا من مباديها
مثل البحر لاقبلت في جزره ومده
كل الكتابات فوق السيف يمحيها
ألها دروب الصبا والغي ممتده
ف دروبها أرواح تذبحها وتحييها
تحب مبدا الوضوح ليا طغى ضده
وتحب الأشياء تسميها بساميها
معها وداع القلوب ولوعة الصده
ومعها عذاب الغياب وحلم أمانيها
وصلت لصدر القصيد وبيحّت سده
وجتها القصايد جزيلات(ن) معانيها
عبيد البديري