يابو موسى موتك المفجع شحني

مرثية في أخي ماجد أحمد الموسى (رحمه الله رحمة واسعة)
قلبي اللي كل ماقلت ارجهني
جاه همه من تصاريف الزماني
والله إني موقنٍ بالموت وإني
مومن باللي كتب ربي وكاني
مير قلبي يا جماعة ممتحني
ممتحني حيل مع قوة إيماني
ياعيون الشعر هلن وادمعني
الدموع اللي قبل اليوم تعصاني
لا بكيت ابكي اخوي اللي حضني
بالمودة و المحبة والحناني
يابو موسى موتك المفجع شحني
طاح عزمي منه واهتز الكياني
ياعمود البيت مافاد المغني
لوتغنا فيك جزلات المعاني
كل بيتٍ قلت وبدعته بفني
ما يخفف لوعتك وسط المحاني
والله إن اللي فقدت وراح عني
مايعيضه في مكانه شخص ثاني
والسنين اللي مضن له يشهدني
يشهدن بصدق ماينطق لساني
ماجداي إلا الدعا له والتمني
رحمة الرب الكريم المستعاني
يغفر ذنوب السنين اللي مضني
ويجعله ينعم بشرحات الجناني