صاحب المواقف

قصيدة رثاء في الشيخ المرحوم/ خريزان بن شالح بن سفران الخنافر، أحد الذين شاركوا مع الملك عبدالعزيز طيب الله ثراه في توحيد هذه البلاد الذي توفي عن عمر تجاوز المائة بسنوات. اشتهر بالدين والشجاعة والكرم
يالله يا منشي ابقدرتك غر السحاب
يا واحد ما لنا غيرك ولي حميم
أنك تقبل ولد شالح بليا حساب
المؤمن اللي على نهج السراط القويم
المخلص اللي حمل سيفه وطش الجراب
مع جيش من وحد الدوله براي حكيم
الصادق الي جوابه ما يخلطه اكذاب
والصدق مطلب مع العاقل ولا ازعل فهيم
واليا عطى شور جاك العلم عين الصواب
مشورة الذرب والعف الشجاع الحليم
اللي شهر بالكرم فالعسر سمح الجناب
امجدع الحيل للغياب واللي مقيم
مرحوم ياللي مشاويحك سوات العقاب
يالصامل امجري الهياب عوق الخصيم
يا صاحب الموقف اللي من وقف به يهاب
صهلت مثل الحصان أو محزمك به جسيم
ما مت يا شيخ لو اتحط جوف التراب
ما دام كل ابلج خلفت مثل العديم
يالله عسى منزل ابو حمود يوم الحساب
مع النبي والصحابة في براد ونعيم
مشلح بن ذياب بن سفران