سيارتي غطيت سطحك مع قزازك مِن حر يِسْتهدف مناطقك الضعيفه

الحر كايد والمواقف لها دور
مغلي حلالٍ واقفٍ عند بيته
مغطي الموتر ولايقبل الشور
خايف عليه من النسايم وليته
خفف غطاه ووقفه جانب السور
هونداي نوعه واضحٍ ما نسيته
إبداع بالتصوير والليل مخبور
عبر الجريده ذاع اسمه وصيته
حمد عبدالله الوايلي - حوطة سدير
سيارتي غطيت سطحك مع قزازك
مِن حر يِسْتهدف مناطقك الضعيفه
ربنا يستر عليك إمن النيازك
العاصم الله من نتايجها المخيفه
اطلبي من غيرها كِل إعْتيازك
لو الدراهم نوب من جيبي نظيفه
سعود عائش الحربي - جدة
من يوم جانا لاهب الحر والصيف
الكل منا موتره في المظلّه
لكن بعضنا ما تجي له على الكيف
المطرحه تكفي وهو في محلّه
والحمد لله داخل البيت تكييف
ننام ما ندري عن الحر كلّه
سليمان بن عبدالعزيز السنيدي - الرياض
يا موتري خوفٍ من اشعّة الشمس
ان ما لقينا شْراع جبنا مطارح
الشمس تحمس دمجة الآدمي حمس
وانتَ مثِل لا شك ما بك جوارح
من يهمل اغراضه شكى باله العمس
ما يفهم الفكرة ولو جاه شارح
محمد مقحم المقحم - الرياض
نرحب بمشاركاتكم الشِّعرية،
وما تلتقطه عدساتكم من الصور
الهادفة والطريفة على إيميل الخزامى:
rb-khozama@alriyadh.com
صورة العدد (عدسة/ عبداللطيف الحمدان)