التعدي على النبي ياجب انكاره..!!

الشعر لا ما تنهض وذا يومه
خاب مضمونه ولا فاد شعاره
دام ماهو في المهمات بالومه
وش به من الفايدة قل معياره
وينكم ياهل الحمية من القومه
في سبيل الله إلى حميت الغاره
جردوا الأقلام فالشعر له هومه
والله انه أحد من السيف باطواره
واطردوا عن روسكم غفوة النومه
النبي امحمد هين مقداره
- الدنمرك - إفحشت صورة ارسومه
والمجر أفحش بتقليل من كاره
تخسا تخسا والله ما تطمس انجومه
وتعجز الكفار ما تحجب أنواره
سيد السادات والدين زيزومه
منقذ العالم من الشرك وانصاره
هو احجابه هو الذراله وقيومه
سيفه المسلول حاميه واسواره
الله اللي فضله فوق واعلومه
هي منار الحق واعلاه واعماره
يشهد الله له بخلقه ومفهومه
والله اللي في هدى الناس مختاره
ياهل الفزعات للدين واقروحه
العدو للدين لا يذخر إحصاره
دولة ما هيب من العيب معصومه
والتعدي في النبي ياجب انكاره
اجعلوها بين الأسواق محرومه
كاسد ما ترسله عند تجاره
البدايل في دول غيرها كومه
تحترم دين الله وترفع إشعاره
عبدالله بن حمير آل سابر الدوسري
وادي الدواسر - اللدام