خادم البيتين بايعناك يالقرم الشجاعي

المشاعر تشتعل ويزيدها فيض اندفاعي
فز قلبي صامل(ن) يا كثر حزات اندفاعه
دام أنا سعودي وجودي من بلادي وارتفاعي
والوطن شامخ وبإذن الله ماضي فرتفاعه
وحده عبد العزيز الصقر مفتول الذراعي
والعدو عن موطن الإسلام مكسوره ذراعه
استمعنا للقياده واجتمعنا اجتماعي
واتحدنا تحت راي(ن) يذهل الكون اجتماعه
ولولاة الأمر بيعه وأمرهم واجب يطاعي
من يطيع ويحتسب تكتب لرب البيت طاعه
يا صراع العمر كله يا معاناة الصراعي
العمر يجري ولا حي تريح من صراعه
فجعة الدنيا ببونا خيمت يوم الوداعي
وحل ليل الحزن والعبرات في لحظة وداعه
للقضايا والعطايا والهدايا كان راعي
حلل الأفكار بالأذكار والإرهاب راعه
يا إلهي يا قريب ويا مجيب لكل داعي
اجعل النفس الزكية نفس أبو متعب وداعه
في جنان الخلد عبد الله مع خير المتاعي
مع عباد(ن) صالحين يكون يا ربي متاعه
وعاش سلمان المليك الفيصلي نسل السباعي
الحكيم الصاطي المقدام زيزوم السباعه
خادم البيتين بايعناك يالقرم الشجاعي
يا سليل المجد شد خطامها طيب وشجاعه
وعاش مقرن للوطن نبراس يشرق بالشعاعي
للدجى نور(ن) ينور والضياء يسبق شعاعه
عضد قائد مملكتنا بالفرح وألا المناعي
والسياسه مخ راسه للوطن درع ومناعه
وعاش أبو نايف محمد ذخرنا عند النزاعي
قوته وقت الحدث تحكم على الشر انتزاعه
شبل من روس الأسود إلي لهم بالجود باعي
كل منهم لحتمى ميدانها يمد باعه
عز للدين الحنيف وللضعيف وللجياعي
أمسحوا دمع اليتامى وبذلوا المال لجياعه
بارك الله فالرجال وبارك الله فالمساعي
ينجلي هم النفوس بوقفة الأبطال ساعه
سعيد بن حسن الفهري القحطاني – الطائف