محاورة

حبيب العازمي
أبا راشد وأبا الشيخي وأبا سالم وأبا سليمان
و أبا عيد ومحمد والعدد ستة .. من باقي؟
أبا اسألهم عن اللي ما يداني حرب و العتبان
ولن ما جاوبوني في سؤالي بحرق أوراقي
راشد السحيمي
تبا هذا وذاك وذاك والله يخزي الشيطان
لكن يا صاحبي لا يلتوي ساقك على ساقي
فالأيام الأخيرة صاروا أصحاب الرخا عدوان
يا شين الضحكة اللي من وراها غدر و نفاقي
حبيب العازمي
ندمدم مشكلة بغداد تظهر مشكلة لبنان
وحنا من شبابه ماش لبناني ولا عراقي
يا راشد تحسب أن الصبر يفتح مغلق البيبان
لكن الصبر ما ينفع بليا بعد و فراقي
راشد السحيمي
يقولون العرب ما فيه عود إلا و له دخان
لكنك لا تعلق مشلحك في كل معلاقي
قبل ما نذبح الفتنه وأهلها ما نصير أخوان
أكيد أن العتيبي لاقي غيري وأنا لاقي
حبيب العازمي
دخلنا داخل القبة وشفنا باشة السلطان
وشفنا حارس القبة سلاحه موس حلاقي
أنا ماعاد أنا راضي وأنا ماعاد أنا زعلان
ولو تزعل عليّ الهند في تسعين طقاقي
راشد السحيمي
ياليتك يا حبيب ما نشدت الترك عن راكان
يقولون الحقيقة مرةٍ ما عاد تنذاقي
لا تنظر للذخاير وأنت راع المحزم المليان
عشيق المهرة اللي ما عشقها كل عشاقي
حبيب العازمي
ليا مني نشدت الترك قالوا فارس الفرسان
ليا جات المزون اللي لها راعد و براقي
نجمع فالدواء مير الدواء ما ينفع المرضان
وأنا لا شفتلي واحد مريض يعكر أخلاقي
راشد السحيمي
نحاول نقفل البيبان وأنته تفتح البيبان
بغى الله ينكبك يا صاحبي مير الله الواقي
يداوون المرض مير المرض يرجع مثل ما كان
وراهم ما يبيعون الدواء في كل الاسواقي
حبيب العازمي
هذا راشد لو أنه لاحقٍ فرعون أخو هامان
لقيته بالعصى واقف على بيبان الأرزاقي
وألا يا بيت ياللي ما بناك إلا أربعه عمدان
تهب أبك الهبايب بآخر الدنيا بلا أرواقي
راشد السحيمي
حبيب صاحبي ماهو عمى ياكل مع العميان
لا تزرقنا مادامك عازمي ما أنته بزراقي
لو أنك ما تخالف ياحبيب ماطلع لك شان
الأحسن قطع رزق الناس و إلا قطع الأعناقي