محاورة

فيصل الرياحي
سلام ياهل الدياراللي عليها سلام
حامينها أهل السيوف الحدب حامينها
الليله الملعبه ماتعترف بالنظام
وليا حضرنا تبى ترجح موازينها
حبيب العازمي
يامرحبا يارجال(ن) من ديار(ن) كلام
يازينها في ليال الصيف يازينها
الليله الملعبه تحتاج ربط الحزام
وليا وقفنا نبى نخزي شياطينها
فيصل الرياحي
اليا خلطت السوالف من حلال وحرام
الكلمه الثانيه عندي براهينها
ياحبيب اليوم خلك شعرة(ن) في سنام
والبدو تلقاك لاشدت بعارينها
حبيب العازمي
أن جنبت في اللحم وأن وقعت في العضام
والكلمه الثانيه تاصلك في حينها
ماني بشعره أنا خصمك قطوع العرام
وان زاد جن البقوم أحشر مجانينها
فيصل الرياحي
أن وقعت في الصخر وان وقعت في العدام
حنا سيوف المعارك وأنت سكينها
الله ربي وربك يامطوع جهام
تسجد على الأرض لا ثارت براكينها
حبيب العازمي
لو مامعي غير سكينن ومطرق بشام
أخذ سيوف أكثرالعالم من يدينها
الله رب الجميع وصاحبي مايلام
هجت ذلوله تلوى في كراعينها
فيصل الرياحي
كم عالم(ن) يحلمون ويشمتون الحلام
ما ردك اعن البقوم ألا سلاطينها
ترا هذيك الهنوف أم الذهب والزمام
ماعدك ألا قذاة(ن) في طرف عينها
حبيب العازمي
وين السلاطين يوم(ن) الشجاري خيام
هي بيض من طبعها ولا مكسينها
وأنته بعد في حدا الخدين دقت وشام
الله يعينك على الأيام ويعينها
فيصلالرياحي
شهد لنا بخيت يوم الهوش تحت العسام
ماهي بكذبه مع العبله مسوينها
عاملتها بالوفا والطيب والأحترام
وأنته تجمع على الخبزه وراعينها
حبيب العازمي
شهادة طيبه لاهل الهوا والغرام
قصيدتن كل خلق الله مغنينها
ياصحابنا لايزيد الطق فوق اللحام
أنتم مغدينها حنا معشينها
فيصل الرياحي
أنتم كما الزرع ياعتيبه وحنا الصرام
الأرض ماعاد تحماكم ميادينها
ياشاعرن في الملاعب لبسوك الوسام
ضيعت في الليل عشرتها وعشرينها
حبيب العازمي
كلمتك هذي ماتنقص للنشاما مقام
ياللي تهدد عتيبه وينك ووينها
يالشاعر اللي نبت لك مثل ريش النعام
ماصالحن للبقوم ألا دكاكينها
فيصل الرياحي
ندخل على الله ترانا مانسب الكرام
أقول لي سالفه ماهم بناسينها
من يوم ركبت طوقن مثل طوق الحمام
حتى أم ظرفين جا دينك على دينها
حبيب العازمي
السب ماله مجال ولايفك الزحام
وأن جبتلك سالفه ميعادك دوينها
مايختلف هالرياحي منتفخ كل عام
كن أم ظرفين غاذيته بظرفينها
فيصل الرياحي
مزكوم ياصاحبي واعديتني بالزكام
دينت بنت الحلال ولا قضا دينها
سبحان من حط جسمك مثل عود الثمام
كنك من أفريقيا وأحد مساكينها
حبيب العازمي
خله لعله عساكم كلكم للهيام
العافيه صح منتم مستحقينها
وزن الخشب طن ولا الماس كيلو جرام
حمر الفلسطين نكبتها فلسطينها