الشعر يتغزل بمصائفنا الجميلة

للوطن

والصيف يحل بحرّه,, وتعطش الناس للجمال الطبيعي والهواء البارد العذب,, وبعضهم يبحث عنه في اصقاع الدنيا المختلفة شرقاً وغرباً, يجيء الشعر ليقول للجميع إن في بلادنا مصائف تتميز عن غيرها بالأمن,, وراحة النفس,, ولا تقل جمالاً عن مثيلاتها في أرجاء المعمورة, وأول المنادين بذلك الشاعر فهد الطويان من القصيم إذ يقول:
قالوا إتصيف وين قلت إبوطنا
غرب أو جنوب وشرق وإلا شماله
أو بالقصيم إديارنا اللي سكنا
ديرة هل الفزعات لاجا مجاله
قالو تروح الناس منا ومنا
قلت الوطن بالعين زايد جماله
المملكة كل إلشوفه تمنا
دار (الحرم) دار (النبي) والعدالة
إزيارته للعبد فرض وسنا
المسلم القادر له الرب قاله
هي عزنا هي فزعة اللي زبنا
عزه ولي العرش جل جلاله
واحة آمان الخايفين إبزمنا
غصبٍ على الحساد وأهل الجهالة
خيره شمل للكل من غيرمنا
ظلل على كل الخلايق إظلاله
نعيش وإن متنا إبثراها إندفنا
وحكم السعودي ما يجيها بداله
يمسافر غلطان كانك تظنا
إن السفر فرض عليك إحتماله
أطفال تجهل والنسا يجهلنا
من طاعهم ضيع قوام الرجاله
اللي جلس بالمملكة ما تعنا
وعليه عاد اللي صرف من حلاله
كم واحدٍ سافر شقى ماتهنا
بالنفس وإلا إعيال وإلا إبماله
وكم جاهل سافر وهو مطمئنا
وبعد السفر اصبح على الكل عاله
يبن الوطن يمسافر عن وطنا
ترهب قريص الداب شوفة إحباله
وإعداد سحب خيلن وامطرنا
صلوا على (محمد) وصحبه أو آله
فهد بن عقيل زايد الطويان
بريدة
الصوت الثاني جاء من الشاعر عبدالله النغاش من الرياض
يا مدور المصياف لا تفوتك أبها
أهلاً هلابك في مرابعك والصيف
في ديرة خضراء كرامٍ عربها
رجالهم يفرح اذا ظافهم ظيف
في ظل ابو فيصل مفرج نشبها
قائد مسيرتنا بحكمته حريف
اللي بفضل الله وفضله جنبها
للخير والقمة مدنها مع الريف
حتى اصبحت ابها من الحسن ابها
يعجز لساني وصف ماتم توصيف
وابن الجنوب البارحة وهبها
نعم الأبو والأخ يادائم السيف
اللي باخلاصه وجهده حسبها
ولمستوى أرقى المدن نال تصنيف
بوجود ابو بندر محلي عنبها
وظف لها الطاقات بالفعل توظيف
جدد معالمها ولبس ذهبها
حتى اصبحت عشق القلوب المواليف
هي ملتقى كل الثقافة لقبها
وصارت لكل الناس مرتاد ومصيف
اميرها الشاعر قصيدة كتبها
ولوحة رسمها بشكل الوانها طيف
سير تلفريك يعانق سحبها
بين الجبال الشامخة والمشاريف
وفيها المطر هتان يروي غربها
على مدار العام بشتاه والصيف
لوما انا عارف معالمك يأبها
لاقول ذي باريس او يمكن جنيف
عبدالله النغاش
وفي الأسبوع القادم المزيد من الشعر عن الصيف ومصائف الوطن,.