أبرك شهو رالعام وابرك لياليه

هل الهلال اللي انتحرا مباديه
وأعلن به الديوان وأعلن وكاده
أبرك شهور العام وأبرك لياليه
شهر به المسلم يزيد العباده
شهر رمضان اللي جزال حسانيه
دايم به المؤمن يزيد اجتهاده
شهر العتاق وحظ من ينقبل فيه
واكبر خساره لي ذهب ما استفاده
أبارك للشعب السعودي واهنيه
واهني جنود الوطن والقياده
والمسلمين وكل قطر نناديه
ذعذع نسيم الخير واقبل براده
الله يعيده والوطن في تعليه
والمسلمين بعز دين ورياده
أوله يا ابن آدم ونصفه وتاليه
مواسم تجلب حظوظ السعاده
حافظ عليها واجتهد في بواقيه
وارفع يديك لمن فرض به وناده
به ساعة ربك يجاوب مناديه
لي جن جنح الليل واحكم سواده
حذرا يفوت ولازم تجتهد فيه
لا يصير همك راحتك والوساده
بعض العرب في الليل يسهر ويقضيه
ضياع وقت وصار للناس عاده
والوقت غالي عند من يعتني فيه
يحسب له العابد ويبلغ مراده
والإسلام والمسلم يا مكثر معاديه
كل يجهز له ويشحن عتاده
حتى النبي ما سلم منهم وماضيه
صاروا يسبونه ومقصد جهاده
والمسلمين نيام كل وطاريه
والبعض ماهمه سوى جمع زاده
قوموا وردوا الشر في وجه راعيه
أما حياة العز ولا شهاده
ما عاد نقبل كلمة من مجافيه
المسلم أخطر شيء سب اعتقاده
هذي هديه من يبي من يوصيه
مقصر في حق ربه زياده
حامد بن غانم الجذع القحطاني