حرّ تسلسل من علو المواكير

سلام حب وقدر يا فاعل الخير
عضيد من قل بزمانه عضيده
مني لبو تركي محبة وتقدير
لو أن طيبه ما تحصره قصيده
فيك القصيد يساق يا سيدي غير
فيك الخصال الطيبات الحميده
الحاكم العادل وريث المشاهير
الطيب اللي فيه دين وعقيده
ثقيل لا هبت هبوب ومعاصير
حليم لا صك الحديد بحديده
لو أوصفه ارسى من طويق والنير
للواجبات المعضلات الشديده
قوي باس ولا يعرف المعاذير
للمبهمات الكايدات العنيده
حر تسلسل من علو المواكير
فيه المدايح والمزايا عديده
وافي وعايز عادته تله السير
مجربٍ حرٍ طلوعه بعيده
في شوفته تنبت زهور ونواوير
حفيد عز وسعد من هو حفيده
يالوافي اللي ما تحسب المخاسير
عون الضعيف اللي حياته زهيده
أشهد شهادة حق من غير تزوير
عسى حياته كلبوها سعيده
نايب وزير الجيش قاد الطوابير
يوم العراقي حرث النار بايده
وقف ابو تركي مثل سالم الزير
في صفحة التاريخ قبل الجريده
أبوه معزي بالسيوف البواتير
خاض المعارك قبل حكمه يعيده
حرر بلاد الخير بالشرع تحرير
ما عاد باقي للجهالة شريده
هو عيدها لا جات ورد ومصادير
رجل السياسة والفراسة وكيده
رد الرياض وطهر القصر تطهير
صبّح هل المصمك والاريا سديده
عساه في جنات خضر ونواوير
أمين يا محيي العظام الهميده
حكامنا آل سعود ما غيرهم غير
الأمن نعمة والحكومة رشيده