شوفة مليكنا بيننا تجلي الأحزان

سميت باسم اللي فرض خمس الأركان
منشي من المنشا حقوق المخايل
سبحان رفاع السما دون عمدان
العالي الطايل على كل طايل
من بعد ذكر الله ولفت قيفان
ولا يزهي القيفان كود الصمايل
أقدم الترحيب من قلب ولسان
باسم سعود وكل سكان حايل
يا مرحبا عداد همال الأمزان
وعداد ما يزهر خضار المسايل
هلا فهام أجا وسلمى ورمان
وحبران والمسمى وقور وخمايل
وهلا فهام الناس حضر وبدوان
كل يقوله صدق مآبه محايل
يا مرحبا والكل بالحيل فرحان
بحضور أبو متعب عريب السلايل
شوفة ملكنا بيننا تجلي الأحزان
عرب النسب نزه الشنب والدغايل
الوالد القايد وللحق ميزان
العادل اللي عادل ما تمايل
الصاطي الليث المخضرم بليهان
الحيد شيال الحمول الثقايل
راع المروة والفضايل والاحسان
حبيب كل الشعب واف الخصايل
حييت يا صقر العرب طير حوران
حيا الله اللي له علينا جمايل
جمايلك وصلن شباب وشيبان
بالمملكة من كل سمو القبايل
كم شايب قام ايتركع بمحجان
من الكبر قلت عليه الوسايل
وكم رملا ماله عيال ولا خوان
صرت ولد له يا كريم السبايل
وكم ميتم تسهر على شان يتمان
متقطعات به حبال الوصايل
مشا لهم معاش شهري ومجان
من زود فضلك يا كثير الفضايل
الله يفكك من صواديف الأزمان
ويا عل عمرك يا أبيض الوجه طايل
أنت المليك اللي بك الكل رضيان
يا عل ما نعتاض فيك البدايل
تستقبل الشايب يا جاك زبان
اللي مع القومة عظامه هزايل
تقضب يده وتساعده وأنت شفقان
يالصيرمي راع الفعول الجزايل
ومن زود عفوك يا خطل الكف زومان
عفيت عن من بك يدور الختايل
الله يعزك يا سلايل كحيلان
يا شيخ لا صاحت عليك الحلايل
يالمؤمن اللي واضح فيك الإيمان
بالخير اللي ما بطيبك جهايل
يالمزبن اللي يزبنك كل زملان
تحري وتذري عن سموم القوايل
أنت العطوف اللي على الشعب حنان
وأنت البطل مقعد صغا كل عايل
ياللي تخاضع لك أملوك وشيخان
مهو غريب منك طيب الفعايل
أبوك وحد نجد بسنان واعنان
على الركايب والمهار الاصايل
يا عل مدخاله مع الباب ريان
بالجنه اللي يطلبون بنفايل
خالك زبون الحرد مروي شبا الزان
يا طار ستر منقضات الجدايل
ابن شريم معرب الجد والشان
خيال شمر كاسبين النفايل
ويسلم عضيدك والي العهد سلطان
الليث أبو خالد عزيز النزايل
واخوان الأنور من قديمات الأزمان
حمولة تروس كل الحمايل
نطلب من المعبود خلاق الأكوان
علام ما بين الضلوع النحايل
يحمي وطنا من قبيحين الألوان
هل الأذى وهل العقول الهبايل
زيزومهم مجرم وملعون حرثان
تلميذ ملعون الجدف والصلايل
حنا وطنا ماش مثله بالأوطان
مهبط وحي رب الملا والرسايل
وصلات ربي عد ما هل ودان
على شفيع الناس يوم الهوايل
الشاعر: مناور محمد السويدي الشمري