الحب وسنينه

تموت بخاطري بعض السوالف والظروف سيوف
وانا في داخلي لك شي ما يطرى على بالك
طعنت بخنجر عزومي ظروف وما قويت ظروف
ويسّرها الله وداس الخفوق ظروفه وجالك
تمنيتك عن عيوني على حد النظر والشوف
أغمّض وافتح عيوني واشوفك عندي لحالك
ثمان سنين مرت بي وانا بين الرجا والخوف
أقرّب طاري بعادك وأبعّد هاجس وصالك
ثمان سنين وشفاه الزمن عيّت تقول حروف
ودمعة لهفتي حارت ما بين الصدّ واقبالك
حرام امدّ لك كف الوداد وما أشوف كفوف
وادوّر فيّة ظلالك ولا أدري وينه ظلالك
ثمان سنين وأعذارك سواليف وقصص وحلوف
وانا عايش على ذكرى لقاك وريحة دلالك
ثمان سنين واحساس الغلا في داخلي مكتوف
تلوفه مطرقة جرح الخطا وسندان اطلالك
ثمان سنين زاحمني الزمان وردّني ملهوف
على حساب الغلا - يا ها الغلا - والشوق وهبالك
يعين الله على ذيك الجروح اللي عثت في الجوف
وشقّت بي وحدتني وردتني على جالك
ونهايتها تقولين ارحل وخل القطار يطوف
لبو رايك لبو شورك لبو حكمك لبو فالك
تبين الجد ما والله على سنين الجروح حسوف
لا ابو هالحب وسنينه لبو الحرمان واغلالك
وتعيش بخاطري كل السوالف والجروح سيوف
وانا في داخلي هم الوداع وهم غربالك