نحط في وجه المعادي وسيمه

عاشوا رجال الأمن حماية الدار
أهل الوفاء وأهل الفعول العظيمه
اللي تحارب كل خاين وغدار
اللي يخون الدار ما فيه شيمه
وشلون يغدر من نشوا بأرضه صغار
ولا حدٍ شكا فالوقت جوره وضيمه
قبلة عباد الله في كل الأقطار
ما هي بدار أهل الصنم والتميمه
المفسد اللي حلل الدم بهدار
ما خاف من ربه ودمع اليتيمه
جزاه منا ماص أحمر من النار
بيدين شجعان حرار صريمه
نصلاه بالصالي من يمين ويسار
ونحط في وجه المعادي وسيمه
عيال الرجال اللي يدوسون الأخطار
هم طب من خطط لفعل الجريمه
يشهد لنا في الدار غايب وحضار
وآخر دليل الرس صارت سليمه
بحكمة شيوخ الدار وافين الأشبار
اخوان نورة طيبين العزيمه
وزير الأمن اللي بنى كل الأدوار
من حكمته ما عاد ينجح خصيمه
نايف حزام الدار من كيد الأشرار
ياالله ياربي علينا تديمه
يا حر يا ابن الحر يا نسل الأحرار
حنا جنودك من سنين قديمه
واختم كلامي شجب للجرم وانكار
المفسدين أهل البلاء والنميمه
وصلاة ربي عد هتان الأمطار
على النبي اللي جلا كل غيمه
سالم متعب شداد المطيري