العين عافت لذيذ النوم

مرحوم يا اللي ضحى الاثنين ينعونه
عساه في جنة الفردوس مسكانه
ويا الله يا اللي جميع الناس يرجونه
ارحم فهد يا إله البيت وأركانه
لا عاد علماً على الشاشة يذيعونه
اطويق يهتز له وتهتز جيلانه
لا هان راس جميع الناس يفدونه
ولا هان قصر فتح للشعب بيبانه
تبكيه كل الدول واللي يعرفونه
وابكيه ويبكيه شعبه وكل جيرانه
ويبكيه ورع يتيم تهمل اعيونه
يصيح ما يعرف اعمامه وجدانه
ويبكيه من ساعة الشدات ينصونه
ويبكيه عود فقد ربعه وخلانه
قلبي يلجلج عليه ويبست اغصونه
والعين عافت لذيذ النوم سهرانه
والقلب عيا يطيع اللي يعذلونه
تكفون خلوه في همه وفي شانه
الموت جسر وجميع الناس يمشونه
ونرضى بحكم الإله الرب سبحانه
مرحوم يا اللي جميع الناس يغلونه
في جنة بين روح وبين ريحانه
وعساه من سلسبيل اليوم يسقونه
ويشمله ربي بكرم عطفه وغفرانه
أهو الفهد كل عدوانه يهابونه
مثل البحر لا التطم موجه وبركانه
هداج تيما جميع الناس يردونه
ولا للشعب غيث يبل الكبد هتانه
حصن حصين وجميع اخوانه احصونه
والحرب يوم اللقا يخوض ميدانه
جوه الصباح وعلى صدام ينخونه
ثم قال صدام يرجع تخسر اعوانه
وكويتكم جيشنا لازم يردونه
والحرب دقوا اطبوله وشب نيرانه
ورجع كويت العرب لاهله وقانونه
وجنود صدام في الدمان غرقانه
وهذا الحرم وسعه للي يزورونه
روعه في شكله وتصميمه وبنيانه
وآذن مكة جميع الناس يوحونه
وزمزم مجهز الكل الشرب حيضانه
وبأجمل طباعة كتاب الله يخطونه
واختار شرع الإله ونهج قرآنه
ومن البحر للبلاد الماء يحلونه
ولا فيه قرية ذكر أو قيل عطشانه
والمملكة شيدت بالحيل مزيونه
وعم الرخا والامن في ساير أوطانه
ويا الله يا اللي جميع الناس يدعونه
عسى العوض في زعيم العرب واخوانه
ويعيش للمملكة وشعبه يحيونه
ويبقى ابو متعب لكل الشعب وعيانه
والشعب صادق معه وامره يطيعونه
ويذود عن دولته ويرد عدوانه
ويا الله عسى من بلا آل سعود يبلونه
تبلاه كل الدول وتزول مرحانه
ويا رب روح الفهد تحماه وتصونه
وعساه يوم الوزن يفوز ميزانه
وصلوا على اللي له الجنات مضمونه
وصلوا عدد ما يرف الطير جنحانه