الموت سنة

رثاء في بندر بن حياد المقاطي العتيبي الذي انتقل إلى رحمة الله يوم الجمعة الموافق 26-11-1425ه :
يا الله يا قابل صلاة المصلين
يا عالماً بمغيبات الليالي
يا خالق آدم من صلالن من الطين
يا مثبت الأرض برواس الجبالي
ناصر نبيه يوم الأحزاب وحنين
على فلول الشرك قوم الضلالي
انك تصبرني على الحزن وتعين
ويا رب ترحمني وتلطف بحالي
مرحوم يا بويه ميات الملايين
عداد حبات الحصى والرمالي
مرحوم يا ريف الضعوف المساكين
تنفق يمينه ما تعلم الشمالي
مرحوم يا محافظ على العرض والدين
مؤمن ومخلص للعزيز الجلالي
تبكي على فقده عيون المحبين
والمجلس اللي فيه صفر الدلالي
ويبكونه الربع القريب والأقصين
ويمجدونه كل ما جاء مجالي
يا العين جودي بالبكا لاتكفين
لو البكا يا عين مارد غالي
لو البكا ينفع قعدت أبكي اسنين
ما دمت حي أبكيه ماني بسالي
عز الله اني فيه ذقت الأمرين
من عقب فقده يا بدر عز تالي
يابوي ياللي يوم الأبوان شرسين
سمح المحيا يوم يجلس اقبالي
بمعامله يأخذ من الرفق واللين
ما هوب شماتٍ حساسه طوالي
عساه ينجح يوم نصب الموازيين
ويثبته لاجاء جواب وسؤالي
لا تآمن الدنيا تراها أم وجهين
كم فرقت من بين غالي وغالي
إن أقبلت تغريك في وجهها الزين
مزيونة فيها تشوف الجمالي
وإن أدبرت قشروا ومفعولها شين
تسقيك من كأس الكدر ما تبالي
والموت سنة والمخاليق فانيين
والعمر قافيه الفنا والزوالي
ما باقي إلا الله رب الثقالين
محيي العظام الفنايات البوالي
يا الله عسى قبره رياض وبساتين
ويعل من حوض النبي الزلالي
والخاتمة يا من سمعني قل آمين
الله يبيحك يا كريم السبالي