ورقة قديمة

يا عبيد يا صقر على كف داعيه
يا عبيد خذ مني وصاة عظيمه
الأوله يا عبيد فرضك تصليه
هذي على الاسلام فرض قديمه
لو ان عمرك طال فالموت قافيه
عن هادم اللذات ما من هزيمه
عملك يكتب بالموازين تحصيه
تشوف ما قدمت عدل وظليمه
الثانيه شي تسرك معانيه
فعل الكرم واقطع حبال النميمه
بيت بليا ساس ما ينزل فيه
سريع ما تنظر بعينك هديمه
الثالثه شر العرب لا تجي فيه
اجهد لهم بالنصح واطف الجريمه
راع الطلب يلحق على طول راعيه
ادخل عنه ولا تزوره بشيمه
واللي يعرف الحق يا عبيد يكفيه
ومن لا يعرف الحق مثل البهيمه
خطو البناخي يرتفع عن بني خيه
الى اغتنى يحسب عناته مقيمه
يدبر الدنيا وهي دبرت فيه
نوب تحلوى له ونوب تضيمه
ومن لايرد الشور لك لا تراعيه
خله بدربه ما يفيد تعليمه
لا خير في رجل يضيع معانيه
يعيش بالدنيا حياته ذميمه
عمه وابن عمه وما يتصل فيه
وضيفه وجاره والخوي والرحيمه
عليه حق لازم ما يخليه
يصون عرضه والسلامه غنيمه
هذي وصاة الوالد ابنه يوصيه
والعمر فاني والليالي مقيمه
شعر: سالم بن حمد الشريف الجهني