أمن ورخاء

هذا الزمان اللي طلع فيه الإرهاب
شرذمة تسلك طريق الضلاله
شرذمة عنها طريق السعد غاب
وابليس عرضها طريق الجهاله
شرذمة سوت عصابات وأحزاب
الله ايلزّمها يدين العداله
الكل منهم يدعي الدين كذاب
ومهوب ويا الدين شين العماله
تلقاه أول شبته كان نصاب
وآخر حياته زادها بالنذاله
ويكفر أهل الدين مقطوع الأصلاب
تقول كنه ما سعي بالبطاله
وهو راس كفره يوم يذنب ولا تاب
وآخر حياته ينتحر شان فاله
ويقتّل اللي ما لهم ذنب واسباب
أتم عيال الناس وأتم عياله
ويحل ويحرم بلا حق وكتاب
ويحلل اللي حرم دمه وماله
فتح لعدوان الشريعة مائة باب
لمهاجمة دين النبي والرساله
يا الله أن تحفظ الدين يا رب الارباب
وتصد عنا أهل الفتن والحياله
في ظل حكاماً طحاطيح وأشناب
حكم خذوه بقوا عزم وبساله
حكام نجد مطوعة روس الاصعاب
آل سعود أهل الوفاء والشكاله
الحكم ما جاهم بتصويت الاحزاب
الحكم جاء بالسيف سيف العداله
أمن ورخاء في ظل عربين الانساب
في ظلهم كلاً ايظلل اظلاله
بارواحنا دون الوطن درع وحجاب
تحت أمر أبو فيصل على كل قاله
حنا جنود الدين عن كل حراب
ثم الملك ثم الوطن والثناله
ما همنا من شب ناره مشهاب
لو نلتفتله ظيع العبد خاله
والختم صلوا عد ناشر وكتاب
على الرسول اعداد منشأ أخياله
فراج مفرح الصميلي السبيعي