مع الإصلاح والشورى وشرع الله وكتابه

الا يالله يا مولاي تفتح للدعاء أبواب
طلبتك وانت من يفتح على كل الملا بابه
الهي وانت شايف مطلع ومسبب الأسباب
مسخر كل شي لغايته وميسر حسابه
خلقت الإنس والجن وبعثت انساب تلو انساب
وميّزت البشر عن كل خائن حي بثيابه
وتوّجته عقل.. واصبح على موقع من الإعراب
رفعته عن بقية ما خلقت وفاض ميزابه
ولو بأحصي رغد ربي علينا ماله استيعاب
مثل من فكر يعد النجوم وتلفت أعصابه
وإن تحصوا نعم ربي عليكم تتلف الأعصاب
تعالى باسمه الرحمن عن شابه وما شابه
الهي والعفو والعافية نعمة وزود اسهاب
وامانك يا عظيم المنزله يبقى ونبقابه
اقوله والتجي بك من (عصابة شلة الارهاب)
عصابه يا محقها الله وجاه الله من عصابه
طغوا.. واستفحل امر المعضلة في شرع حكم الغاب
بغوا.. واستوطنوا ما بين فك الداب وانيابه
عثوا.. وليا قلعنا ناب ورث منه ناب وناب
لهم شرع ولهم مذهب ولا نعلم وش اسبابه
من ايام الصحابه ما قرينا عنه حرف كتاب
سوى من بعض من يخرج عن الإيمان وآدابه
خوارج والخوارج ما لهم في شرعنا ترحاب
هدفهم يضربون الدين في قلبه ومحرابه
ألو غل وألو فتنه.. ألو طيش وألو احزاب
ألو مالا يطيق المسلم يشيله على ما به
احدهم حجته حجة ضغينه ما لها سرداب
والآخر وسوس الشيطان في راسه.. ولا يابه
لو انه فكر رويدا تمهل وامتثل ثم تاب
دحر شيطانه الملعون قبل ينجّس ثيابه
مثل ما غيره من الناس عود واحتسب وآناب
عليه انه يرد الحق لاهل الحق ونصابه
ولكن ما يفيد النصح.. والما ما سمعته راب
فلا تابوا ولا شفنا لهم شي انتهقوا به
ولا يكفيهم التخريب في شتا بقع وأقطاب
خذتهم بالجهل عزه على هالدار وترابه
بلد ما يعرف الا الأمن والتسليم والتحباب
بلد.. سيد بني آدم توصى فيه واوصابه
بلد يستاهل التصفيق والإفراط بالاعجاب
بلد خلا بلاد الأرض من طيبه تقدى به
هنا مكه.. هنا طيبه.. هنا التوحيد والألباب
هنا نجد وهنا حايل.. هنا الدمام نزهابه
هنا ابها.. هنا السوده.. هنا من ما يلذ وطاب
هنا كل المناطق تمتثل للحكم واصحابه
فلا يجرؤ بشر يخشى على نفسه من الإضراب
يمس بهالوطن شعره.. ولا يدري وش مصابه
نعم حنا لها ما دامنا ستر وعليه حجاب
على ما قال.. كل صقر وله ريشه ومخلابه
تحت راية فهد نبقى وتفنى دون فهد رقاب
ولا هو بس فهد واحد.. هناك فهود وذيابه
تباشر يا ملكنا وافتخر.. شعبك سهم وشهاب
على من لا يطيع الله.. وشور امرك ولا هابه
تقدم والأئمة درعك.. وشعبك ولاه حراب
معك يا قايد الشعب السعودي وأول احبابه
معك خطوة بخطوة لين ما نبدي مع المرقاب
مع الإصلاح والشورى وشرع الله وكتابه
عسى الله لا يشتتنا ونصبح ف.. الزمان اغراب
الهي وانت قادر تدحر الشيطان واذنابه
نبي عزٍ يدوم ولا نبي ذل وراه اتعاب
و لا نرجي من الدنيا سوى رضواك نحظابه
ما دام انا على نهج الرسول وسيرة الأصحاب
تسير القافله.. والحقد دايم تنبح كلابه