يا نجم القصيم

يا هجوسي حضري واكتبي مني سلام
سالم من قلب مخلص ومن فكر سليم
قاصده للشاعر اللي مواقيفه تمام
يا عسى ما اسمع بيومه,, عسى عمره مديم
لا بو عادل مني أزكى تحية واحترام
كل ما ناحت حمامه وما هب النسيم
أحمد الناصر,, عزيز وله عزة مقام
مثل حد السيف والسيف حده مستقيم
كلمته,, هي كلمته ما يتراجع بالكلام
من رجالٍ بالوفاء شانهم شان عظيم
أصلهم أصل عريق ورجاجيل حشام
من جهلهم يسأل اللي عرفهم من قديم
وكل حاسد نوره الله يبدله بظلام
وكل من مره وشافه يقول الله كريم
اعتقد من سمعني ما يلحقني ملام
من يلحقني ملامه تراه اكبر غشيم
وانت يا احمد شاعر المعرفة والاهتمام
صاحب المعنى,, وشعر بلا معنى عقيم
ينشرى معناك يوم المعاني ما تسام
إيه هذا الشعر يا صاحب المعنى الحكيم
فوق يا نجم تشعشع رغم سمك الغمام
فوق يانجم القصايد ويانجم القصيم
أمدحك واشيل مدحك على صدري وسام
وافتخر باسمك وقف له على العظم الصميم
ثم أسولف عنك لو رحت شرق ورحت شام
ألفت الأنظار لمتابعة شعر وسيم
ما نسيتك,, ما نسيتك ونسيانك حرام
وأنت وقفاتك معي مثل وقفات النديم
بيض الله وجهك بكل يوم وكل عام
جعل من جابك مكانه بجنات النعيم
قلتها من صدق مالي بها قصد ومرام
بس أقول الحق والله سبحانه عليم
والحقيقة كسر نظرة قليلين الرحام
أهل النمة عساهم,, عساهم للجحيم
يا بو عادل لا عدمتك وفيك العز دام
يا عضيد اللي من الوقت الأقشر مستضيم
لك تحية طيبة فالبداية والختام
شيمه وقيمه وأكرر وأقول انك حشيم
راضي غالي الرشيدي