في رثاء فقيد الوطن الأمير ماجد بن عبدالعزيز رحمه الله

لو لم يكن لفقيدنا الغالي سمو الأمير ماجد بن عبدالعزيز من الاعمال الجليلة الا خدمة حجاج بيت الله في الفترة التي قضاها أميراً لمنطقة مكة لحق لنا الحزن على فراقه.. لكن سموه يرحمه الله كان من أصحاب الاحسان والمواقف الانسانية التي نسأل الله أن يجعلها في موازين حسناته ولم أستغرب ان يهيج فراقه مشاعر الشعراء كما هاجت العيون بالدمع الغزير لفراق الراحل العزيز..
نسأل الله ان يتغمده بواسع رحمته. ولأن الشعر أبلغ من النثر في التعبير عن المشاعر الانسانية فتعالوا إلى هاتين القصيدتين الباكيتين الاولى كتبها الشاعر/ بدر بن سعود الظاهري.
والثانية كتبها الشاعر عبدالله بن سليمان النودلي:
***
يا جعلها تحرم على ماجد النار
يا جعلها تحرم على ماجد النار
يا الله ياللي في يدك خلق واعمار
يا عالم في سر الأيام والغيب
سجدت لك عبد مسلّم للأقدار
روحه على دين منزه من الريب
بسمك بديت وبسمك الوقت دوار
أجر صوت الحزن من دون ترتيب
علم لفاني جابه أخوي «صبار»
زاد المعاطيب القديمة معاطيب
تكسرت روحي يا صبار.. وش صار
قال: العزى والله لروس المراقيب
قلت العزى للأرض واللي بها سار
ماجد يابو ممدوح ذيب ولد ذيب
من راس عودٍ حرر الأرض والدار
في حد مسنون السيوف المحاديب
حرٍ ليامنه كفخ بين الأحرار
هام السحاب بكفخة العز والطيب
والبارحة هزت طويلين الأشبار
البارحة وقفت جميع التراحيب
طفت سماء مكة وجدة والأنوار
يغيب ماجد ليه يوم انه يغيب؟
نبأ وفاته زود الجمر والنار
على القلوب اللي تحبه بتعذيب
تبكي عليه صغار تنوحه كبار
الله لوتنفع عليه المناديب
يا لله بمنزال تجاريه الأنهار
بجنان عدن الصافيات المشاريب
من حر مابي جيت يوم العزى حار
نيابة عن ربعي أهل المواجيب
ياصل ذويه وشبله الوافي البار
عبدالعزيز مهذب الطيب تهذيب
راع الوقوف اللي يشرف والاذكار
اللي مناقلها فخر يطرد العيب
رجل عرفته صلب راسه ومغوار
شوق البنات المترفات الرعابيب
ما هو بحاجة مدح أو حاجة أشعار
لكن يجل الشعر وبذكره يطيب
له بالضلوع الحدب منزل ومقدار
قريب من روحي ومن عيني قريب
وكلامه اللي مثل هتان الأمطار
وسام عز شلته إبلا مقاضيب
يبقى على روس المشاهير تذكار
قاله عزيزٍ خص فيه المعازيب
يا سيدي جيتك وأنا ابنك البار
نيابة عن ربعي أهل المواجيب
يا جعلها تحرم على ماجد النار
آمين ياللي تعلم السر والغيب
بدر سعود الظاهري - الرياض
***
في وصله الارحام ما احدٍ يجاريه
بسم الذي كل الخلايق تناجيه
ربٍ رحوم وشافي كل عله
مالوم كفي والقلم لو كتب فيه
مالوم عيني تذرف الدمع كله
مالوم من يبكي على فقد غاليه
مالوم منهو كل هم يتله
ومالوم أنا الأقدار كل تواليه
ومالوم منهو القدر صاحب له
ترى القدر من ربنا هو يجاريه
ربي يبتلى كل عبد ويحله
هذا امتحان وكل مسلم يبي يجيه
تصبر وترى النبي شافعله
ماجد ترى من بدت الناس نغليه
صار المرض من مدة صاحب له
جاه المرض ولا لقى من يداويه
كل الدكاتر شافته في محله
طالبك ياربي انك تهنيه
في جنة الفردوس هي منوة له
واغفر ذنوب اللي تفاقت لياليه
اقفى وفعله باقي شاهد له
ريف الضعوف ومنبع الخير كله
أبو اليتيم اللي فقد شوف أهاليه
خلي عيونه بالفرح مستهله
في وصله الارحام محدٍ يجاريه
متمسك بالدين دقه وجله
ومرحوم ياللي كل ماحل طاريه
دمعي كما وبل السحابه تهله
مرحوم ياللي ما شكى منه عانيه
في مجلسه ينعم بفيه وظله
عسى جنان الخلد له مرتع فيه
يلقا بعالي جنته منزل له
في رحمة اللي ما يخيب مناديه
رب رحوم وغافر كل زله
اميرنا اللي مابقى غيره ماضيه
ورجال تعطي دون منه وكله
بديت بالمبداء وجتني مباديه
وأعزي أبو سعود باللي حصله
والختم صلو عد رمل مغطيه
على النبي واعداد روس الاهله
عبدالله بن سليمان النودلي /بلدية مدينة بريدة