الحويماني: الشعر ذنبه كبير وزلته زله

فيما مد للعالم يمينه

مدخل: محمد الحويماني شاعر شاب يكتب بقلق الشاعر لأنه صادق متمكن من أدواته يعرف أبعاد قصيدته..
قصيدته عذبة تروي عطش متذوقي الشعر لما تحمله من عذوبة في اللفظ والمعنى.
الحويماني شاعر جميل وبسيط وهادئ مليء بالحب.. يجيد التعبير عما بداخله بأسلوب شعري رشيق ولطيف.
والذي لا يعرفه الآخرون عن هذا الشاعر انه يمارس مهنة «الطب» فهو يقدم الدواء لكل من يشتكي من الألم ليعالج بذلك الأعضاء العضوية فهو من خلال هذه المهنة الانسانية يمارس انسانيته بكل ما أوتي من علم.. وفي أوقات كثيرة يقدم غذاء الروح للجميع بما يكتبه من شعر.. سوف نقرأ له «12» ورقة من أوراقه الشعرية والتي بكل تأكيد سوف تفوح منها رائحة الابداع.. تذكروا محمد الحويماني فهو شاعر قادم بقوة..
(1)
يحق لك تعتب علي وتشره
مع إني ادمح زلتك ما تشرهت
لاني ادري لو تشرهت مره
عليك تكبر شرهتي ما تنبهت
(2)
من غبت والناس كن نفوسها قشرا
الطفهم اللي كسر روحي وهلابي
الجرح يبرا لو ان الوقت ما يبرى
شف وقتي اللي خذلني ويش سوى بي
(3)
الشعر ذنبه كبير وزلته زله
يارب ترضى علي وتغفر ذنوبي
أمسيت مثل الكبير اللي غدا دله
وأصبحت مثل الصغير ابين عيوبي
(4)
جيت أعشم بردنا.. بالصيف لكن..
الفصول الاربعة.. برد ورتابه!!
أه لا صار الغلا بالجرح ساكن
والخناجر كلها.. ربع وقرابه!!
(5)
كل ما فكرت بازعل منك وأعتب واتضايق
ضاقت الدنيا علي..وجيت لك زعلان.. راضي!!
(6)
يا عيد تدري وش اللي مر في بالي
خلاني اعتق رقاب الدمع في عيني
اصحابي اللي بعد ما بارت احوالي
ما منهم اللي نشدني وش جرى فيني!!
(7)
أقفيت واشباه الاوادم لهم رمس
شحوا علي بضحكة ما لها قيد
طاح الشجر في ذمتي طاح والشمس
توجع ولابه غير ظلي.. على البيد
(8)
ماجيت أقول القصيد.. ورحت اغني به
ولا كتبته لعين وكف عشاقي
من يوم وقتي ثعت فيني مخاليبه
والشعر طير وسماه بداخل اعماقي!!
(9)
هذاك دمعي وكنه صار بأسبابك
يجفى عيوني وروح ينتخي قربك
وهذاك صوت رميته ساعة غيابك
حتى صداه استخار وهج مع دربك
(10)
تعالي يالسنين الاوله.. يالمقبله فوتي
نعيد أيامنا «طبعا» من آخرها الى أولها
علشان اليدين اللي تحرضني على موتي
تقدر موقفي لا من رفضت اني أموت لها!!
(11)
احترت يا صاح في بوحي وكتماني
وأزريت حتى المس المضمون بيديني
أنا الغريب وتعبت اشتاق لأوطاني
ذكرت ربعي نهار.. وجيت ناسيني!!
(12)
أنا اللي مد العالم يمينٍ كلها تقدير
ومدوا لي سيوفٍ نصرها ينشاف في عوقي
خروج..
أغيب لكن لا حضرت وتكلمت
داريت شرهة غيبتي في حضوري
أنا الذي عن منة أنوارهم شمت
وكم واحدٍ يبغى يجي تحت نوري