بيت وبيت

إذا قلت قولي تاخذ أهل العقول القول
وتحفظ كلامي قدر الإمكان وتقوله
(حجاب بن نحيت)
****************
نعم وأنت قد القول والفعل عرض وطول
وشعرك إلى بعدين ما تنضب سيوله
***
جرّيت صوتي تالي الليل جرّه
والناس هجعا وأرفع الصوت بأبيات
(خلف بن هذال)
****************
واللي رقد ما أوحاك ماله مسره
يا شاعرٍ صاغ البيوت الجزيلات
***
اخترت صمتي يوم غيري شقا به
وحياك يا طيبٍ مزونه مراديم
(صنيتان المطيري)
****************
صمتك يابونواف ما ودنا به
عوّد وسمعنا جزال الترانيم
****************
يساورني يقين إن المطر غلطة هوا عالي
حسب نفسه يصالح غيمتين وبلل ثيابك
(فهد عافت)
****************
يساورني يقين إنك تشك بقدرة الوالي
نسيت إن المطر قدرة عزيز من عدم جابك
***
أحيان قلبي ملاذٍ للقطا والحمام
وأحيان شمس (عليها) الورد ياما ذوى
(منصور الحربي)
****************
بدل (عليها) (تحتها) يا عزيز المقام
الشمس فوق وتحتها الورد وأهل الهوى
***
القوس مكسور والرامي يقوم ويطيح
والسهم منعاج والايام خازوقها
(متعب التركي)
****************
يا شاعرٍ بيتك السابق جزيل ومليح
(خازوقها) جت نشاز بزين طاروقها
***
يالله نعيش الهوى مثل الخواجات
لاخوف لاهم لا منقود لاعيب
(فيصل بن مجفل)
****************
يا حيف يا نسل أهل مبدا وعادات
تترك طريق الصواب وتتبع الريب