الأجل مكتوب

لو الدموع ترد غالي كان سيلنا بحور
من موق عين للغلا يدفق على الخدين ماه
ولو القدر ياخذ بدل ماماتوا طوال الشبور
إن كان دورنا بدل من جايز العالم فداه
لكن ما ينفع بكا مادامها الدنيا عبور
الأجل مكتوب قبل ما نخلق.. بغيب الإله
والآدمي يقضي حياته بين لوعات وسرور
أيام في خير وفرح وأيام في هم وشقاه
هذي تصاريف الزمن تال البنادم للقبور
الموت ماخلا النبي واللي لهم قدر وجاه
يا سيدي سلمان بالاحزان والهم معذور
معذور يا أمير فقيده.. بأزرق الدمعه بكاه
احمد نديم للوفا دايم على دينه غيور
فيه الشجاعة والكرم فيه الشهامة والصلاه
وشلون ما تبكي العيون وتظهر بما في الصدور
واميرنا عن شوفته حكم القدر ضفّى العباه
ويا سيدي فيصل عسى الله والي العرش الغفور
يجبر عزاكم في الفقيد ويلهم الصبر أقرباه
الموت حق ولا نقول الا: يعين الله الصبور
والنفس ترجع للولي.. لو العمر طول مداه
يا الله تجمعنا بهم في يوم بعثك والنشور
في جنة الفردوس يا الله يا مجيب لمن دعاه
عيد بن سعود الشدادي الحارثي - الرياض