أمواج

والموج دالوب الضماير قصفها
خلا ضلوعي كنها كسرة أدراج
إما ضربها الموج وإلا شطفها
حتى بدت نار الحشى توهج أوهاج
من علة بالقلب ماحدا كشفها
واليوم أنا قلبي بداء يزعج إزعاج
علة خفى بالقلب ماحدا عرفها
ياما تحملها يبا سرعة أفراج
حتى نفذ صبره وتوه حذفها
كله سبب وقتا بداء يزعج ازعاج
وغيب الليالي ماش شخصا عرفها
أشوف ناسا ماشية درب منعاج
حياتهم ما ينعرف وش هدفها
طيبهم اللي دايم الدوم هراج
اللي على الزلات نفسه عسفها
كنه على الهرجه شفيقا ومحتاج
يفرح أليامنه تمسك طرفها
واحد على العربان والنسا دواج
وإذنه عن علوم النشامى صرفها
والجار عن جاره يبي درب مخراج
كلا حقوق الجار قلبه حذفها
إلا إن كان الجار من جاره احتاج
فحقوق جاره فوق قلبه نسفها
دنياً تشيب رأس ورموش وحجاج
ميلاتها ياناس وشهو هدفها
يالله دخيلك ما نبي لبسة التاج
استر علينا الحال لين اتخطفها
ومادام للميلات ما يوجد اعلاج
ياحظ من سيئات نفسه كتفها
زيد منور الشعيفاني