يوم الوطن

يوم الوفا والمجد يوم المروات
يوم الوطن ذكرى لتأسيس دولة
تاريخها منقوش فوق المجرات
دولة لها تاريخ ما أحد يطوله
دولة شموخ بالبذل والمكرمات
دولة أمن وآمان دوله بذوله
وشعارها التقوى ودور العبادات
يوم ان أبو تركي بصوله وجوله
حرر بلاده واعتلت بالبطولات
عز الله انه داهيه في فعوله
ليث بهوماته تذوب الجمادات
واليوم حنا لابو متعب وحوله
وهو الزعيم اللي لعد له علامات
زعيمنا اللي في كرمه وشموله
بنى مع العالم وشعبه علاقات
له موقف بالعز ما أحد ينوله
وله كلمة يخرس بها أصوات وأصوات
غاب وتشوقنا لعطفه وزوله
ومن قبل يا صلنا وصلتنا البشارات
أصدر أوامر قبل لحظة وصوله
واعطى لشعبه من يدين نديات
مثل سحاب الوسم يرجى هطوله
وإذا هطل تحيي عطاياه الأموات
بالبذل والمدات نفسه عجوله
والا التأني عادته كل الأوقات
وعن الخطأ والظلم نفسه جفوله
والا هو امضى من سيوف رهيفات
وكلماته لشعبه درر ومعسوله
وعلى العدو رماح ما هيب كلمات
والوقت لا من زاد كربه وهوله
بحنكة أبو متعب تهون الصعيبات
عبدالله أرسى الحكم على أصوله
حيث ان له رأي وعزم وهومات
ومن ضمن الاصلاحات واحدى حلوله
لجنة تحقق في فساد الإدارات
وقضى على الإرهاب وانهى فلوله
بضربات مدروسة لكل الخليات
الله زرع بقلوب شعبه قبوله
حيثه حنون مخلص طيب الذات
شبابنا واللي بسن الطفولة
وشيوخنا والغاليات العفيفات
نحب موطنا بعرضه وطوله
هيهات يرخص للمعادين هيهات
هذا وطنا باوديته وسهوله
أرواحنا من دون حده رخيصات
ونحب حكام عطوا وارخصوله
أعمارهم واوقاتهم بالملمات
واللي يحرض شعبنا وقفوا له
وخسر بحنين وعاد يزبد بالاهات
يا داعي لحنين نفسك جهوله
ما تدري انّا ضد ذيك الدعايات
أنت تحسبنا ننجرف بالسهوله
والا تحسبنا ننخدع بالشعارات
يا من على الفتنة قرع في طبوله
تموت ما شفت ابلدنا اعتصامات
من بيننا التخريب صعب دخوله
حب الوطن واجب بكل الديانات
ما نبيع موطنا ونأخذ عموله
ولا نفرط فيه لأهل الخيانات
حنا مع آل سعود ربع وحموله
شعب وحكومه لا فتن وانقسامات
عطاالله بن سليمان العطا الله - الزلفي