كلام من ذهب

لا ضاق صدرك عالي الصوت جره
لو كان قلبك ما يطاوعك مسرور
دنياك لو تسوى من الحِزن ذرّة
ما كان تاليها توابيت وقبور
وما كان للكافر بعمره مسرة
وما شفت في ملكه ملايين وقصور
العمر يمضي بين حلوه ومره
والموت حق وقابض الروح مأمور
دام الحياة الفانية مستقره
ورزقك يجيك وبين الأجواد مستور
لا تنشغل بالوقت برده وحره
واحذر تصير بقسمة الناس مقهور
وحكم القدر لاجاك خيره وشره
أشكر عظيم الشأن والذنب مغفور
والمجلس اللي يزعجك لا تمره
خله تراك بشوفته ما أنت مجبور
والرجل سقها في صحاصيح بره
ومد النظر ما بين ريضان وزهور
لا صار وجه القاع ما فيه جرة
والمشي حافي والثرى تو ممطور
ساعات صمتٍ ما وراها مضرة
تسوى الكلام اللي به أذنوب وإشرور
أطلق خيالك وأترك النفس حرة
وخل الطبيعة في حياتك لها دور
وبالليل لا بانت نجوم المجّرة
أذكر بديع الخلق بإحساس وشعور
واسجد لرب الكُون مرة ومرة
وأحفظ لسانك وأترك الكذب والزور
وفروض ربك خلها مستمرة
وطاعتك لا يدخل بها نقص وقصور