العيد في عيون الشعراء

يحل هذه الأيام على الأمة العربية والإسلامية جميعاً ضيف عزيز قريب إلى القلوب طالما انتظره الجميع فالكل مشتاق إليه.. انه العيد.
نعم العيد فرحة وبهجة وأفضل الناس في هذا العيد هو من امتدت يده لصلة ما انقطع الود بينه وبين اقاربه واصدقائه.. نعم انها ايام لاحلال المحبة محل الشحناء والخلافات.. كثيراً من القصائد كتبت عن العيد ولكن مشاعر الشعراء تختلف من شاعر إلى آخر وهانحن نعرض إليكم بعضاً من القصائد قيلت عن العيد لمجموعة من الشعراء:
ونبدأ بقصيدة للشاعر الشيخ محمد البراهيم الوافي:
للعيد فرحة وانتظار وهدايا
ويا زين يوم العيد بين الأجاويد
يا سيدي يا سيد كل البرايا
احترت اناشا اهديك في ليلة العيد
اهديك قلب هام بين الحنايا
يغرد بحبك له سنين تغريد
والا عيون من سهومك ضحايا
ولا ما تشوف الا انت يا صافي الجيد
والا كفوف تلتهب لك شظايا
من شوفها لك ما تبي باقي الغيد
والا قصيد يرتجف بالشفايا
يسوقه احساسي بليا مواعيد
خذ ما تبي مني وكلي عطايا
خذ ما تبي يا صاحبي من دون تحديد
كلي حلالك يا عقيد الصبايا
آمر تدلل وانت لك كل ما تريد
يا ليتني ارضيك واثبت وفايا
ويا ملها تعجبك هدية العيد
* ويقول الأمير سعود بن بندر يرحمه الله :
أقول في نفسي وانا اعايد الناس
متى بشوفك تكمل افراح عيدي
اجامل وربي عليم بالاحساس
وشهو شعوري وانت عني بعيدي
الي خذاني لك على السهر هوجاس
ماكني الا وسط ربعي وحيدي
لو حسوا بما بي يقولون لا باس
بدال قوله على وعيدك سعيدي
لا صرت عندي وقتي اعياد واعراس
حتى ولو في وسط سجن الحديدي
* والشاعر علي المفضي يقول:
دموع العين هلت فوق خدي صباح
العيد والعالم سعيدة
على من كان لي واليوم ضدي
يعاند مثل دنياي العنيدة
حبيب ظالم بيّح بسري
تناساني وانا قلبي يريده
الي شفته مع الشارع معدي
اقول القلب هذا يوم عيده
* كذلك قول الشاعر صنيتان المطيري:
يا عيد ما لك فرحة في عيوني
نسيتني مدري زماني نساني
ما قدرت افراحك تعانق شجوني
احزاني اكبر من كلام التهاني
حاولت اجاري فرحتك وكشفوني
لا جيت ابضحك ما استمرت ثواني
إلى ان قال:
يا ليتهم يدرون من غالطوني
ان الهوى ما عادله عصر ثاني
ويا ليتهم يدرون من عايدوني
ان الفرح لما له بقلبي مكاني
* وهذا جلعود لافي الشمري يقول:
العيد جاء عادت علينا لياليه
بالخير وأيام الرخاء والسعادة
بالعيد كل ينتظر شوف غاليه
وغالي يجي غاليه عقب ابتعاده
العيد حل وحل بالذوق حاليه
وفيه التسامح بين الاخصام عاده
على الذي طبع الحياء من مباديه
على الوفاء على المروءة وداده
* وقال عبدالله سعود الصقري في قصيدة:
أهدي التهاني والتباريك واشيد
بإعلامنا وأقلامنا والجرايد
للعالم المسلم جميع الأجاويد
اهل الثناء وقت الرخا والشدايد
وثنى التهاني بأشرف القول وازيد
حكامنا آل سعود دروس البدايد
إلى ان قال:
كل الوطن عم الفرح والأناشيد
بالعيد يوم النصر ولا من سايد
عيد سعيد للعروبة وتجديد
بالدين والدنيا والايمان زايد
مع منهج التوحيد والعلم ونشيد
صرح الحضارة بالوطن كل فايد
* وتقول الشاعرة نورة الشبيلي:
هالحين صار العيد عندي سعيدي
يوم اهتنى قلبي بشوفة حبيبه
شفت الغلا لي في عيونه اكيدي
بدد سلامه كل شك وريبه
طبع الوفا عنده وعندي فريدي
قصه هوانا في وفاها عجيبه
إلى ان قالت:
يا عيد يا عيد المحبة والاسلام
عساك بالافراح دايم لنا عيد
الله يعيدك بالفرح والرضا التام
والنصر والتمكين وافراحنا تزيد
* ويقول خلف بن سليمان البجيدي العنزي:
اقبل علينا العيد محلا قباله
يا ما حلا بالمملكة فرحة العيد
عيدك مبارك يوم مجالي مجاله
يا خادم البيتين يا راعي البيد
لك الولا والأرض في كل حاله
لك يا فهدنا وثنى العلم تأكيد
مولاي شوفك عيدنا وحتفاله
ويا ليت لو عيدك على كيف ما نريد
ونمسك يمينك ما نعايد بداله
يا عد عمرك عيد وسعيد ويزيد
زف لصحاب السمو والجلالة
امباركه بالعيد والعيد تجديد
طاعه جميع الشعب له الشكاله
اللي لهم فضل علينا وتوحيد
لبلادنا يا بلادنا رمز الاصاله
بحس شاعر ما غوى بالتماجيد
داري حباها الله مبدى الرساله
ومهبط وحي ثم احكموها صناديد
والعداله ما قضت بالعداله
وحكم الشريعه ما يبيله مناقيد
ويا دارنا والعيد حروة قباله
عيدك امبارك يا مقر الجاويد
* وقال سعيد مقحم السهلي:
العيد عمت فرحته كل الأوطان
ثم اشرقت شمس المحبه سناها
يهدي من الفرحة تغاريد الأوطان
ويرسم على البسمة حلاوة شفاها
وحد جميع الناس صدقان واخوان
والنفس وصلها لغالي مناها
كل يقول العيد مبروك يا فلان
الله يعيده رب الارض وسماها
ويجمع قلوب عقب فرقا وهجران
على الفرح طيب يكسب رضاها
يطيب شوف اللي للأحباب ولهان
نظرات عينه بالمودة ملاها
* ويقول عبدالله غازي الحنيني:
العيد حان وبالمعاني قصدنا
ببيان من هيض المشاعر مواريد
ابيات من در الجزيلات زدنا
مثل الورود اليانعه بالعناقيد
ابيات في تنظيمهن اجتهدنا
نصوغهن ونعيد ونفيد ونزيد
ابيات نهديهن لقايد بلدنا
اللي على الطوله فعوله محاميد
الله يديمك للوطن يا فهدنا
يا سيدي تبقى واهنيك بالعيد
* وقال الشاعر خلف ابوزويد الشمري:
يا راكبه وصل سلامي امكيده
قل له ترى قلبي تمزع امزوعي
كل نهار العيد عايد وديدة
وانا نهار العيد عيدي ادموعي
* وهذه قصيدة قديم الشوق حيث يقول في العيد:
للعيد فرحه يا حلو فرحة العيد
نشوة أمل في وجيه الاحباب بانت
وللعيد غنوة وابتهاج وتغاريد
في الديرة اللي لسلم الاجداد صانت
وللعيد ذكرى في العيون المساهيد
يوم الجروح الماضية حيل لانت
وللعيد شوق وذكريات وتناهيد
في عيني اللي طول الايام عانت
وللعيد لهفة عند بعض الاجاويد
يوم الطبايع تالي الوقت شانت
وللعيد عقد يلبسه نايف الجيد
ذيك الجفول اللي على الروح مانت
* ويقول الشاعر هلال المطيري:
ما اقول غير الله يهنيك بالعيد
حقك عليَّ ابادلك بالتهاني
في خاطري والا ترى عيدي بعيد
شوفتك عيدي كان لي عيد ثاني
* ونختتم رحلتنا مع هذه الأبيات لعبدالله تركي عبدالله السديري:
العيد حل ونجم الاحباب ما هل
اللي بشوفتهم جروحي تشاوت
والموق في لوهو الدمع ما لحل
على البعيد اللي له النفس ناجت
الناس في اعياد وانا جسم منسل
ما عاد بي غير العظام وتلاشت
لولاي اوسع خاطري كل ما ذل
يوم فرقاه ذا لروح ذابت
يومه نشدني قلت ما نيب انا ادل
ذيك الديار اللي لها النفس عافت
ليته صبر وياي وفي نجد ما مل
ذيك الحزوم اللي لها النفس مالت
الله يوفق صاحبي وين ما حل
ونفسي ترى ما مر يوم وعاجت