حلول اللغز

نشرنا في عدد الجمعة الماضي لغزا كتبه الشاعر ثامر القطيم السبيعي ونصه:
أنشدك عن رجل رفيع وقاره
رجل بدونه ما تقلط ربوعه
طيب وطيبه بس خارج دياره
والا بداره ما تبين نفوعه
وقد وردنا العشرات من الحلول الصحيحة ومنها:
نرحب بصفحة للمعاني منارة
بعداد وبل فالبسيطة وقوعه
جادت لنا بلغز جزيل العبارة
حله جواز السفر عرفت نفوعه
محمد بن حميد الشيخ
قويزه
***
اللغز له بنت تسير بمساره
تحل في داره وتطلع طلوعه
هذا الجواز اللي يمر السفاره
يحل بديار وعلى الله رجوعه
شافي بن عبدالهادي بن راجس
الدلم
***
اللغز لو تخفيه نكشف اسراره
صاغة عريب الجد وهاذي طبوعه
أكبر هوية للسفر في مساره
اسمه جواز ولو تغير بنوعه
فهد شافي الشعبي
بريدة الضاحي
***
باسلوبه الناجح وحسن اختياره
الصدق هيله والنزاهة قدوعه
صدر على درب الصراحة مساره
عنده جواز ابداع يشعل شموعه
محمد عبدالكريم الغزي
الزلفي
***
ثامر كتب لغز صحيح اختياره
لغز ثمين وكاملات فروعه
ذاك الجواز اللي عليه الاشاره
تاشيرة برضاه تمشي بطوعه
خليف الحربي
الرياض
***
ثامر بنظم الشعر مثل المناره
ونفسه لجزلات المعاني بتوعه
ولغزك عرفنا رمعته باقتداره
جواز السفر يا مصغي لي سموعه
عبدالمحسن داخل القثامي
جدة
***
لغز السبيعي فيه فن ومهاره
جيد وفي تصميم معناه روعه
هذا جواز للسفر والزيارة
دون الجواز الشخص يصعب طلوعه
ساير منور الرشيدي
بريدة
***
من الشمال ارسل حسين العبارة
يم القطيم اللي فريد بنوعه
الحر يفهم يا السنافي الاشارة
هذا الجواز اللي كثيرة نفوعه
زايد بن ونيس الحازمي
طريف
***
لغز عليه مواصفات الحضاره
تمشي مع العالم كتايب جموعه
حله بموضوع السفر والسفارة
جواز تلقي باللوازم ارموعه
نافع الحربي
الرياض
***
هذا جوازك لا نويت الزيارة
لو كان ما حددت شكله ونوعه
خارج بلادك سجله بالسفاره
وهذي سواة اللي يهمه رجوعه
إبراهيم شفاقة العتيبي
القصيم
***
الشعر دولة والجزيرة سفاره
تهتم به وايضا تجمع دموعه
واللي يبيه يمرها باختباره
وياخذ (جواز) الشعر بأكثر فروعه
عطا الله بن سليمان العطا الله
الزلفي
***
يا كاتبين اللغز جزل العبارة
لغز يجي حله بتالي اسبوعه
مصدر جوازك من قطاع السفارة
قسم مخصص بالمناطق فروعه
زيد بن جريد بن سعدا
بريدة
***
يا ثامر محمد ترى العلم شاره
ولغزك مع الالغاز يا طيب نوعه
اخذ جوازك لا نويت الزياره
مسافر بلا جواز يلزم رجوعه
زهران عون الله المطيري
بريدة
***
نجيب حل اللغز عند السفاره
من شاعر بالشعر ذا طول بوعه
والحل واضح صادر من قراره
هذا جواز تتبع الناس طوعه
فالح غازي الحربي
رياض الخبراء
***
أهلا هلا بك في جميل العبارة
يا اللي كتبت اللغز هذي رموعه
سجل (جوازك) عند راع السفارة
واللي يتهاون يبتلش في رجوعه
علي رشيد الرشيد
رياض الخبراء
***
حل اللغز يبغى فنون وشطارة
ولا كل واحد يعرف اصله ونوعه
واحفظ جوازك عن خبيث وكاره
وترى الجواز ان ضاع صعب رجوعه
فواز بن محمد معزي الخالدي
سكاكا
***
درك جوازك لا تجيك الخسارة
من ضيعه برى رصيده دموعه
يندم وياقف عند باب السفارة
ولا يدور من رفيق فزوعه
عبدالرحمن بن مرشود العلوني
قويزة
***
وش حيلة اللي راح وقته خسارة
ودنياه فيها كل شيء يروعه
وطاف (الجواز) وصار ما له زيارة
واجازته ما هي على كيف طوعه
خالد بطي الخمعلي
القصيم
***
ما أحب انا من غير اليوم داره
يروح للخارج ويترك ربوعه
ولغز السبيعي واضح بالاشارة
هذا الجواز وما أبي كل نوعه
محمد رغيان الشمري
حائل
***
يا مبدع الالغاز رمز واشارة
من عالج العسرات بانت ابدوعه
الحل واضح (والجواز) استمارة
من جرب الأسفار يعرف انفوعه
فهد محمد الحزاب
الرس
***
اللغز واضح ما تطلب شطاره
على طريق الحل تلمع شموعه
احفظ (جوازك) لا تشوف الخسارة
لا ضاع ما تنفعك كثرة فزوعه
مشاري خالد الدعجاني
شقراء
***
يوم السبيعي بالوفا شب ناره
جينا على الحروة نبارك طلوعه
نتبع خطاه ,, ولو رحل عن دياره
عبر (الجواز) نشوف حزة رجوعه
فهد الجروان
الزلفي
***
صلوا عدد ما ثار عج بغاره
وعداد ما ينبت وتورق فروعه
وعداد من يحمل جواز وزياره
على نبي كل الامة تبوعه
هندي نابت الغياثات