لا تظلميني

مع زمان ظلمني
يكفي جفا وعناد يكفي ظلايم
أنتي وحظي والزمن ما خدمني
زدتوا همومي هم والحظ نايم
وقتي مع اللذات جار وحرمني
وقت عنيد وذقت منه الهزايم
لا راح هم عاد هم وصدمني
والهم في وجهي بداله علايم
هم ملازمني وزاد وزحمني
وأمسيت في بحره غريق وهايم
إما رحمنا الله محد رحمني
رجاي بالمعبود منشي الغمايم
لانتي فهمتيني ولاحد فهمني
والقلب ما هديته على كل سايم
إلا صديق غالي ويحترمني
ما طاع بي عاذل وواشي ولايم
هذاك لا منه بصوته زهمني
افزله من غفوة النوم قايم
يستاهل التحشيم منهو حشمني
وعن الردى نفسي عزيزة وشايم
اللي هضم حقي عليه وهضمني
حقه على أنساه وأجفاه دايم
ان كان حبك مع زماني هزمني
يحرم علي ألبس جميع العمايم
شاعر سعودي