مساء الخير

مساء الخير هالمرة بلاش آسف على التأخير
مدام الرد بعيونك دموع فكل تأخيرة
ثقل دم العذر، والأكسح وجه الخطا تبرير
مدامك عارفة طبعي أجل وشوله الحيرة
ترى ماجيت لجل اسمع سواليفك عن التقصير
أعرف ان الخطا مني (بلاش نعيد هالسيرة)
انا وانتي بهالدنيا تحملنا بعضنا كثير
تعوّدتي على عنادي، وصرت أحب هالغيرة
انا وانتي حكايتنا مثل صدر السما والطير
كثير اللي يطالعها، ولحدٍ طالها غيره
انا وانتي حكايتنا مثل لعبة، وطفل صغير
مع انه دوم يهملها رفض يسمح بها لغيره
انا وانتي وشاوصفلك عجز عن وصفنا تعبير!
مثل ! مدري ! مثل وشو ! ولكن صعب تصويره
انا وانتي بلاش انتي أنا لو بفقدك شيصير
عليم الله لو ماانتي فلا طبيت هالديرة
أحبك ايه أحبك ذي بعد يبغالها تفكير
يخلف الله على عقلٍ ملكتي كل تفكيره !
تعالي نحترم (شيبة غلانا) لعنبو التصوير!
تعالي نغتنم فرصة لقانا دامها قصيرة
ومساء اللي تبين انتي على قولك (صباح الخير)
أنا كل يوم بتأخر اذا في دمعتك خيرة