ساعة أقول ... باي باي أمريكان !

العامل ساب المطرقة والسندان
والفلاح ساب الأرض والبستان
والتاجر شد باب الدكان
وطالب وزميله محلا الشبان
الكل جواه يغلي بركان
خارجين بيهتفوا بصوت رنان
طلب واحد محدد الآن
لازم نقاطع الأمريكان
النبض العربي جرى بالشريان
وصوره متكررة بجميع البلدان
طوبة تكسر زجاج بنيان
وعصا جندي بتضرب شبان
والنتيجة والحقيقة الكل خسران
وعدو يفوز ووطنا يهان
لسه ما حان مقاطعة الأمريكان
يعني انت وِيّهْ الأمريكان
أبداً أنا نفسي من زمان
أغمض أفتح ما أشوف أمريكان
لكن مش بالغضب ولا صوت رنان
ولا شعارات تنكتب بخط فنان
ولا طوبة تنْحِدِف تكسر بنيان
ولكن بالعمل في الميدان
تتحرر بلادنا من الأمريكان
إزاي قولنا؟ فهمنا نورنا كمان
العامل يقف قدام النيران
ماسك مطرقة حاضن سندان
يطرق حديد يعزف ألحان
يصنع أبرة يصنع فنجان
يصنع عربة بدل الشكمان
يصنع طيارة غواصة كمان
يغزل ملابس تكسي البردان
ساعتها أقول باي باي أمريكان
والفلاح يرجع زي زمان
يصحى الفجر مع الآذان
يطلع في موكبه على الغيطان
ملك ماشي من غير تيجان
يبدر أرضه يرويها بجبينه العرقان
يغرس شجر لمون يغرس رمان
وسنابل قمح بترقص على العيدان
وقطن أبيض يمسح الأحزان.
جمهورية مصر العربية - محمود عبدالحميد قريش.