مسرح الشرق

التين والزيتون..والخزي والعار=والظلم سكيّن العدو والسلاطين
كذّاب من قال العرب دمّهم حار=ما هزّنا موت الشرف والبريئين
إلى متى والفعل في قيد الأعذار؟!=الضعف فينا لو غدينا ملايين
الشرق مشهد غرب.. واحنا له أدوار=بالمختصر.. صرنا لهم مسرحيين
صرنا صباح تْقدّمه نشرة أخبار=يُسْدل وحنّا له أهم العناوين
لو كان غرس الخير في أرض الأشرار=ما تزهر أغصانه ولو تربته طين
مصيرها للذلّ / والفاس / والنار=فتنة شياطين البشر والملاعين
وجه النفاق / المخلص / الخاين / البار=القاتل اللي في صفوف المعزيّن
هو يحسب إنّه سهل يستعبد أحرار=خلْقوا على العزّة.. وماتوا عزيزين
الصمت جهل الحقّ.. والكون دوّار=فيه الحقايق ماتدوّر براهين
أكبر هموم الشعب درهم ودينار=في وقت ضاعت به جميع الموازين
يا مجدنا اللي صار ضايع ومنهار=ما ملّ صبرك قول بكره وبعدين؟!
مؤمن بأنّا للقدر ما بنختار=إيماننا بالنصر.. لو هو بعد حين
يمكن مصايبنا عقوبة وإنذار=في وقت فيه الدين يبكي على الدين !
عزّاه يا عصر الصحابة والأخيار=وينه صلاح الدين يا حرب حطيّن؟!
لو كان فينا معتصم ياخذ الثار=ما ذبلت أصوات اضطهاد المساكين
التين والزيتون والشعب أحرار=يحيا رغم ظلم العدو والسلاطين