( دوامة التوديع )

توي الليله حزين وخايف ولانمت توي=صرت في دوامة التوديع ياصعب النهايه
لحظةحسيتها مبطي على قلبي تنوي=لكن انسى كلما دلت تسولف عن غلايه
صوتها جاني حزين احس به شيء يكوي=ماهواللي لاانخنق صوتي احس انه سمايه
ولاهواللي لاارتخت نفسي يسولف عن علوي=ولاهواللي لااحظبت علمني اقرطها ورايه
عشرة جروح وهذا الصوت في قلبي مدوي= والله انه ياجماعه ياكل ويشرب معايه
والله انه حلمي اللي بالمعاليق متطوي=يكتب بدفتر شراييني ويقرا في عنايه
مااشوف الناس معمي عن جميع الناس ضوي=كلما فتشت باحلامي لقيته في مدايه
جيت اسولف ماقدرت اقول مدري ويش اسوي=ياما طاحت دمعة حسيتها يوم البدايه
كنت اجاحدها سنين وقلت جاك اليوم روي=ماذخرتك غير هاللحظه وخابرها قفايه
الرياح السود فجت قلبي وقامت تعوي=واحطبتني مابقى عرق يسولف عن رجايه
فتنة شفت الغلا فيها قليل وجا غلوي=حطها درب تسابقه الخطى يم الهدايه
غادة يومن مجاهيم الظما قامت تلوي=اتركتني مع تضاريس الوهم اشرب ضمايه
طاح بي حلم السنين وجى على راسه مخوي=وانكسر شاعر مثل ماينكسر فارس ورايه
قلت بعدك والله ان الليل مااذخر عنه سوي=لااسهره يامايبين الصبح في مفرق سمايه
قالت التوديع مايضعف غلا بعضه يقوي=كيف اودع من بكى عمره وغنى في هوايه
انت في دمي وعمر البعد مااخلف فيك نوي=وانت تدري ويش معناتك بدمي في النهايه
كلمة حول النص
رؤية - هليل المزيني
من النصوص التي كان قد خصنا بها الشاعر والكاتب الغائب الحاضر عمر الرحيل، هذا النص ( دوامة التوديع ) والذي يجسد تجربته الشعرية الثرية.
(عمري) شاعر تميز بالابداع وأشتهر من خلاله وهو من خلال هذا النص، يحلق بنا في فضاءاته الخاصة من خلال هذه الدوامة التي أثمرت لنا بهذا النص الفاخر.إقراوا عمري لتستممتعوا بالشعر الجميل وعذوبته حيث يقول: