شرايكم بهالخبر اللي مدري شلون قايل؟!

• يا مرحبا يا معنى خط الاقلامي.. مرحبا بكم في نشره أخبار لول، ليه نشرات الاخبار ما تبدأ بشي يخلي الواحد يسفهل، حنا خلاص اخترعنا طريقة جديدة تخليكم تسفهلون مع الاخبار اللي تمغص البطن وتجيب الحرقان، واللي يبي يستفيد من ناحية صحية ننصحه يحط على قناتنا ويروح يخلص شغله واكيد لا رجع يلاقينا حاطين برنامج وثائقي عن اطلق واحد يقلد صوت البجعة..الى استديو الاخبار..
• الاخوة اللي يتابعون ويتحرون اننا نحط حريم يقدمون اخبار نقولهم معصي وبعيد عن شواربكم، ما عندنا غير فحوله الواحد شنبه واصل سره، وعيب عليكم تسوون حالكم تابعون اخبار وانتم قصدكم تفرجون على الحريم اللي يقدمن الاخبار، حتى نشرة الاحوال الجوية ما راح نجيب بنات لو تطلع بروسكم نخلة ، وابشركم نفكر نجيب حسن كراني، عشان يكركم بتوقعاته اللي من جنب القدة، فديت ابو كراني وحشتنا ايامه، كانت الاخبار ما فيها سيول ولاغرق، من جونا حقين الاخبار الجوية هاللي يتميلحون جانا البلا.
• اول اخبارنا من المجر، عشان تعرفون اننا وكالة انباء صدقية وماعندها لعب طمرنا للمجر وجبنا لكم خبر عن ريسهم، يقولون انه خوش رجال ويمدحونه ربعه، بس ما جاز له تصرف زعيم حزب متطرف عنده انه حضر اجتماع برلماني بلباس مدري شلون قايل، الريس المجري قام يطالع بريس الحزب ولسان حاله يقول: وش يحس فيه ذا، جاي الاجتماع بلباس جماعة عنصرية من زمن جدي، وده يطرده من القاعه، بس هم ما عندهم احد يقدر يتصرف من راسه، تعوذ الشيطان وهجد وكل اللي قدر يسويه انه يلسعه بكم كلمة تسم البدن، ريس الحزب الزاحف للحين ما وصله العلم عشان كذا ما رد على كلام ريسه، ومن المتوقع انه راح يكون رده «اهدا من كذا يابو الشباب»!
• قبل أمس فيه وزير بريطاني سابق اكلها، يعني راح فيها، يعني كان مفهي وجالس بمكتبه وما درى الا الطعان يوم طعنه وخلاه يبرم كنه طير مملوصه رقبته، عاد هم ما هم مثلنا لا نطعنت تموت عشر موتات ولا جاك اسعاف، على طول خمه الاسعاف لاقرب مستشفى، ويوم فحصوه زين قالوا لاهله لا تخافون ما راح يفطس، وكلها كم يوم ويدخل عليكم زي الحصان، الشرطة قامت تحوم وتلصلص لين كفشت مراهقة يهقون انها هي اللي ساس البلا، بس للحين ما بان معهم شي يسوى، الوزير جته هالمره سلامات ويحمد ربه ان ما راح فيها.
• المهم الحين نبي نسكر الاستديو اخلصت اخبارنا، كل واحد يروح يشوف شغله، ما عندنا غير هالخبرين، منين نجيب لكم اخبار زيادة، تبوننا نرسل واحد منا يذبح احد عشان ننقل لكم الاحداث لا يف وتنبسطون،لا والف لا، ترى عاد الاخبار حلاتها انها ما تكون واجده، كل شي لا زاد عن حده يسمج، بس لا تخرعون لا فتحتوا القناة حقتنا ولقيتونا مطفين تحسبون ان احد طمر علينا وحاسنا، لا سلامات، بس حنا نشجع صحة البيئة ونساهم في نوم الناس بدري!