والله قلوبنا اللي (حديد)!

خنا مغير نتفرج وندربي روسنا، الحديد ارتفع، الحديد انخفض، سعر الطن كذا سعر الطن مو كذا، زي اللي يتابعون مباراة تنس ارضي مره يلتفتون يمين مره يلتفتون يسار، وين ما راحت الكوره تروح اصمختهم، مرات يقلون لنا السبب مكافحة اغراق البلد من قبل دولة ساكنها خشومهم فطس، ومرات يقولون ارتفع السعر عشان مواد الحديد الخام ارتفعت، قبل كم يوم صدر قرار كبير بشأن موضوع الحديد، واليوم اللي بعده صدر قرار، حنا ما علينا من القرارات، عارفين انها بكل الحالات ما راح تنوضع عشان عيون المواطن، لان وزارة الصحة ما جابت خبرنا، ان شاء الله نبي بيوتنا بدون حديد عسانا ما سكنا ولا بنيننا بقريح اوش ما بغوا بزارينهم اشتروا لهم، والا انت ياخ يا مواطن، لا تفرح ان اجتماعات وزارة التجارة عشان قرار لعيونك، لا يا بعد حيي، لا يا خلف طوايفي، هذولي فريقين من التجار قاعد يتشاوتون المواطن زي ما سوى ميسي بحارس ريال مدريد يوم بغى يكسر رقبته بذاك الهدف اللي لا يصد ولا يرد، فيا حبيبي يا مواطن، اهداف وزارة التجاره لا تصد ولا ترد، مالك الا توضى وتصلي وتقرا المعوذات وتدهن صدرك بفكس، ترى ربك عالم الخوافي موجود، الحديد ومالحديد، مشكلة ما لها حد، الا بناس تخاف الله في المواطن المسكين اللي يبي يبني بيت، يبي يسكن ويضف بزارينه، ترى غليان الاسعار، كسرت ظهورنا، ولازم حل جذري مع هالتجار اللي اخر ما يفكرون فيها ظروفنا، همهم يكنزون من القروش ولو تطلبون منهم تبرع لجمعية خيرية خلاك تراجعه شهرين كاملين بلياليهن، هذا اذا ما قضبك الباب من اولها، عجبي!