رمضان كريم

يقولون ان الكرم ما فيه صفه كويسه احلى منه في الانسان، والانسان الكريم هو أفضل انسان بالوجود، وعشان حنا باخر زمن الله يكفينا شره، صارت نفوس الناس ما عاد تتحمل أحد، صار الاب ضايق صدره من ولده والولد يبي الفكه من ابوه، ما عاد احد يعطي من نفسه شي او يتنازل لخلق الله، كل من همه نفسه، اشغلتنا الدنيا الله لا يشغلنا الا بطاعته عن واجباتنا اللي برقابنا حق والدينا وحق اقاربنا وحق جيراننا وحق الاوادم الثانين اللي مو شرط يقربون يكفي انهم أوادم، اعتقد والله العالم ان رمضان لانه اقدس واشرف شهر اخذ اسم كريم، والرجال مهما كانت فيه من حقانه وطبع اقشر لا صار كريم الكرم يغطي على السلبيات الثانية غيره، والزوجة لا صار زوجها كريم لازم تغض الطرف عن عصبيته والا عن انشغاله عنها، ما في احد كريم في هالدنيا الا ربي موفقه بماله وصحته وصحة عياله، جرب تكون كريم، لا تقول انا فقير من وين اصير كريم، الكرم والجود على قد الحال، اللقمة لو قسمتها بينك وبين محتاج صدقني ان ربي راح يعوضك عنها في الدنيا والآخرة، لا تخاف من الفقر لا صرت كريم، بس بنفس الوقت انتبه من المعاصي اللي مذكورة بالدين انها تنكب راعيها وتورثه الفقر، رمضان كريم، وفرصة هالايام المباركة انكم تكونون كرماء ماليا وأخلاقيا!