جاتكم الفيران

أنا أبصم بيداتي ورجولي ومتأكد مليون في المية إنه كل أهالي جدة عندهم غراء فيران ومصايد فيران في بيوتهم الله يكون في عونهم، ومعاهم حق في الحكاية دي لأنه الفيران استوطنت في كل أحياء جدة سواء كانت أحياء قديمة أو جديدة والسبب كلوو من أمانة جدة لأنه السكان بيقروا التصاريح الرنانة حقتها كل يوم والتاني وبيصدقوا المساكين لكن للأسف ما بيشوفوا حل للمصيبة دي اللي هلكتهم وعكننت عليهم حياتهم، والمضحك المبكي إنو أمانة جدة اعتمدت قبل كم سنة مكافأة محترمة لكل واحد يقتل فار واعتمدت لهدا الموضوع مبلغ 60 مليون ريال بالله ده كلام يصدقه واحد عاقل.. كل يوم بنقرأ وبنشوف تصاريح حلوة لمكافحة الفيران وكل يوم بنقرأ ونشوف إنه الأمانة اعتمدت ملايين الريالات عشان تكافح الفيران لكن للأسف كل يوم الفيران بتزيد.. يا أمانة جدة كل الدكاترة والمستشارين المختصين في صحة الإنسان بيقولوا الخطر جي وبقوة وبيهدد حياة أهل البلد إذا ما تحركتي وشفتي حل في حكاية ملايين الفيران اللي جالسة بتنخر في مدينة جدة..