مو الرز بس يا لجنة المنافسة

شايفتك اليوم فرحان ومصهلل إيش الحكاية؟ كيف ما اكون فرحان ومصهلل ولجنة الفصل في المنافسة سوت خير في الغلابا اللي في البلد وغرمت تجار الرز 80 مليون ريال لانهم جالسين يشتروا ويبيعوا في الرز على هواهم وبيحطوا الأسعار اللي تناسبهم الله اكبر عليهم ولا يشبعوا.. وفين شفت ده الكلام يا سيدي؟ اهو مكتوب في الجريدة وبالبنط العريض.. أصدرت لجنة الفصل في مجلس المنافسة غرامات مالية تقدر بنحو 80 مليون ريال ضد عدد من المنشآت العاملة في مجال الأرز، لارتكابها عدة مخالفات لنظام المنافسة والمتمثلة في التحكم بسعر الأرز والاتفاق على تحديد السعر، وفرض اشتراطات وقيود على عمليات البيع مع الأسواق المركزية والتي أدت إلى تقييد التجارة والإخلال بالمنافسة العادلة.. شايفه كيف هادول هما بعض من التجار اللي ما يخافوا الله واللي الدنيا دخلت قلوبهم واللي جالسين يشفطوا في دم المواطن يرفعوا قيمة السلعة عشان يلملموا الملايين بس كتر الله خير لجنة المنافسة كشفتهم على حقيقتهم وغرمتهم بهادي الملايين اللي حتبكيهم دم زي ما بكونا وبهدلونا وطفرونا وهما كل يوم والتاني بيرفعوا أسعار الرز على كيفهم، عشان كده نتمنى كمان من لجنة الفصل في مجلس المنافسة انها تراقب كل السلع الغذائية اللي يحتاجها المواطن واللي بيتلاعب فيها هادول التجار المسيطرين على سوق المواد الغذائية واللي مافي في قلوبهم رحمه على عباد الله لانه اللي جالس بيصير في سوق المواد الغذائية لا يرضي الله ولا رسوله. فوضى ما بعدها فوضى والدليل انه اغلب الاسعار بتختلف، صاحب البقاله يبيع بسعر وصاحب السوبرماركت بيبع سعر وهادي اللي بيقولوا عليها هايبرات بتبيع بسعر والمواطن الغلبان راح فطيس بين الاتنين. عشان كده نتمنى انه لجنة الفصل في المنافسه تشد حيلها وتشوف حل لهادي التجاوزات واللي بتصير في اسواقنا من بعض ضعاف النفوس واللي بيسمووا نفسهم تجار عشان تفضحهم وتشهر فيهم وتغرمهم ملايين الريالات وتوقفهم عند حدودهم. وقبل ما ادردب وامشي اقول للتجار خافوا الله في عباد الله ارضوا بالقليل عشان ربنا يبارك لكم فيه لانه في النهاية ما حتاخدوا من الدنيا دي ولا شي كل الحكاية حفرة ومتر قماش وقطنة وكل واحد وعمله وعيشوا كتييييير تشوفوا كتيييييير.