القطاع الخاص اتفقوا علينا

بالبلدي الفصيح

على فين كده يبو فتو؟ يعني حيكون على فين يا جارنا يامعتوق على العمل طبعا.. ليه مو قالوا خلاص حيعطوكم اجازة الخميس؟ ياسيدي أهو انت قلت قالوا وياكترهم اللي بيقولوا، وزارة العمل بتقول، ووزارة التعليم بتقول، ووزارة الصحة بتقول، ووزارة التجارة بتقول، ووزارة الاسكان بتقول، وكلوو بيقول لانه الكلام ما عليه جمرك لكن في الاخير ما اقول الا زي ما بيقولوا الكتاب الكبار «اسمع جعجعة ولا ارى طحنا» دحين انا جالس اكلمك في اجازة الخميس تقوم تدخل في موال تاني. يعني يا معتوق ياحبيبي انت صدقتهم هادول، من اول السنة ونحنا نسمع عن اجازة الخميس حتى انه الموظفين الغلابا اللي في القطاع الخاص طاروا من الفرح لما سمعوا وقريوا عن ده الخبر لكن ياحبيب قلبي كلوو هقص في هقص لانهم هادول حقون الشركات والمؤسسات الخاصة بيجتمعوا بمسؤولي وزارة العمل وبعد الاجتماع يقولوا حندرس اجازة اليومين وحلني لما يجتمعوا تاني مره وبعدين ياحبيب قلبي هادول الكبار اللي في الشركات الخاصة ما تفرق معاهم ان شاء الله يشتغلوا 24 ساعة طالما دخلهم السنوي بيوصل لملايين الريالات وبيركبوا اخر موديلات للسيارات وساكنين في فلل يجري فيها الخيل، لكن الشقا والبقى على الموظف الغلبان اللي بياخد منهم الفتات لا وتنطبق عليه كل الاجراءات النظامية والغير نظامية هدا غير التعسف في استخدام النظام وياما في القطاع الخاص من مظاليم لانه المثل الحجازي بيقول «الشبعان ما يفت للجيعان» يا اصحاب الشركات والمؤسسات الخاصة ايش اللي يمنع انه يكون في اجازة يوم الخميس لانه الجمعه اجازة رسمية بطبيعتها وايش اللي يمنع انه تتحدد وتتغير ساعات العمل من 48 ساعه ل40 ساعه زي ماهو مطبق في بعض الدول المتقدمة، وايش اللي يمنع انه يكون الدوام من 7?30 إلى 3?30 زي بقية العالم والخلق حرام عليكم هدا الدوام اللي في القطاع الخاص مو دوام هدا اسمه دمار، ياناس ياهوه هدا دمار للموظف ودمار للصحة ودمار للأسرة ورعايتها، الموظف بيدخل الشركة او المؤسسة الساعه 8 الصباح وما يخرج منها الا الساعه 5 العصر وعلى بال ما يوصل بيته ويتغدى يكون المغرب أذن وتبغوه بعد كده يشوف مصالح بيته وزوجته واولاده يا اصحاب الشركات والمؤسسات ترى الرحمة حلوه وارحموا من في الارض يرحمكم من في السماء ورسولكم الكريم بيقول في الحديث الشريف «من لا يرحم الناس لا يرحمه الله» عشان كده بقول الله يخلي لنا ابو متعب صاحب القلب الرحيم سيدي خادم الحرمين الشريفين انه يتكرم ويصدر قرار فوري للشركات والمؤسسات باعتماد يوم الخميس اجازة ويرحم هادولا الموظفين المغلوبين على امرهم ويخليهم يعيشوا زي العالم والناس وعيشوا كتييييير تشوفوا كتييييير.
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة
abofatoo@hotmail.com