لا تعاتب الناس

مابمعاتب الناس خير
اللي يسولف بكيفه لاتدور وراه
بعض القناعات ماتحتاج راي وشوير
كلٍ على منهج افكاره يشوف الحياه
ان قلت يابن الحلال الادمي مايطير
يقول جدي يطير ويشهدون الرواه
وابوي فارس وانا شيخ وعقيد وامير
من قو باسه كسر جيش العدا في عصاه
عنده سوالف يوردها على جم بير
وعلوم يرقى بها قمة جبال السراه
وان كان عارضت رايه قال لك مايصير
يزعل ولاتسمع الا بالجالس رغاه
يسب غيره وهو مثل الجمل له هدير
ويحط له شاعر وشيلة فخر بالقناه
يرقص عليها معَ لكزس وشبك وبعير
ويصدقونه خبولٍ مااحتموا في ذراه
ياقوم ياغطرسة ناسٍ تسب القصير
ماعندهم غير هذا به وهذا وذاه
لاشفتهم قلت عز الله مابالناس خير
لو هم يصلون بالمسجد بوقت الصلاه
أوادمٍ عندهم حبل الخيانة قصير
مخافة الله بالالسن والفعايل طغاه
الدين ماهم بيمه بالمقام الاخير
اهم شي تكسب مع الناس شهرة وجاه
عش ذيب واليا بدى لك شي لاتستشير
العيب قبل الحرام وحافظين الوصاه
وش عذرهم لابدى الموقف وصاح النذير
وجو عند رب الخلايق كلبوهم عراه