عيدك مبارك

العيد شرّف والتهاني لها دور
وكلٍ على خله بيرسل رساله
مجبور يا قلبي من البعد مجبور
ومجبور ياقلبي من اللي جراله
لا تعتذر معذور معذور معذور
ادري غلطت ابرقمنا والرساله
عمرت في قلبي عمارات واقصور
سبعة قصور وكل قصرٍ لحاله
عمرتها بالحب دور ورى دور
والفكر يملكها بواسع خياله
وفرشتها من مهجتي ورد وزهور
وحققت له ماكان يخطر ابَاله
وصارت علاقتنا مثل بيت مهجور
بيتٍ به الاشباح تسكن بجاله
مرّت عليه اسنين وايام واشهور
وبيتٍ غلط لازم تجيه الازاله
جرحي عميق ولانفع فيه دكتور
ولحدٍ عرف بالقلب واللي جراله
حقك عليّ اقول روّح ومشكور
عيدك مبارك بس كلٍ بحاله
انا لقيت اللي له القلب مسرور
واللي سكن بالصدر والهم شاله
عهدٍ عليّ اصون يا شمعة الحور
سر العيون اللي حجبها بشاله
نشمي بن مقعد العتيبي