عسى مقرّه جنتك بين الابرار

أبيات رثاء في سماحة والدنا الشيخ صالح بن عبدالرحمن الحصين رحمه الله:
ياالله يامنعم علينا بالامطار
يامنشي المزن الثقال الغزاري
ياالواحد المعبود ياالنافع الضار
تسمع دبيب النمل جوف الغداري
يامن شققت اسماعنا هي والابصار
كسيتنا بالدِين وحنّا عواري
الحمد لك تعداد ماسايرٍ سار
وعداد ماهبّت علينا الذواري
ياللي كتبت الموت لصغار وكبار
لاجا حمام الموت ماله مداري
للنفس قبّاضٍ وللقبر حفّار
موتٍ كتبه الله علينا قرارِ
صار الخبر في نشرته راس الاخبار
قالوا تُوفِّي الشيخ نسل الحرارِ
أشوف شقرا تنثر الدمع مدرار
على ابنها ضلعانها والبراري
ضجّت عليه المملكه وام الامصار
مع عالم الاسلام والكل داري
مات الحكيم اللي من العقل فوّار
أكبر عذاريبه على الزهد ضاري
فيه التواضع جم فاالعلم بيطار
ولمحكم التنزيل حافظ وقاري
محبوب بين الناس في كل الاقطار
وابوه من قبله على الشرع ساري
أعزيَ الحصنان عالين الاذكار
في روضة المسجد سوات السواري
وكل الوطن من ربعه لضلع سنجار
ولعالم الاسلام ليل ونهارِ
عسى مقرّه جنتك بين الابرار
ندعيك يارحمن مروي الخباري
تمّت وصلّوا عِد ماتزهر ازهار
على شفيع الخلق ما حل طاري
سعود بن عبدالعزيز بن صالح بن مقرن