سيد شهور السنة

حي الله الوافد اللي نرقبه كل عام
سيد شهور السنة وشلون نستقبله؟
هل نجعله شهر يفرق بس باسم الصيام؟
أو نجتهد في جميع أوقاته ونشغله؟
لا والله إلا أشغلوا وقته صيام وقيام
بقلوب في طاعة المعبود مسترسله
فرصة وكلٍ على القدرة يشد الحزام
كلٍ يحاول يعيش الشهر ومن أوله
والرابح اللي رفع قلبه لرب الأنام
في توبةٍ صادقة من كل ذنب إفعله
وأشعل نهاره بصوم وذكر خير الكلام
والليل يحييه بقيامه ولا يهمله
بالصايم إلزم كتاب الله وعطه اهتمام
وأكثر من الخير والرب الكريم إسأله
ثم أذكر بعامك الماضي معك كم صام
من شخص واليوم تحت الأرض رهن إعمله
في دنيته كان تفكيره بطول المقام
ما فكر أنه يبا يرحل ويترك هله
خذ منه عبرة وقلبك يالذكي لا ينام
لا تاحت الفرصة إغنمها وقولك قله
بادر بتوبة وجنب عن دروب الحرام
والفرصة الحاضرة تفرق عن المقبله
والصوم ما هوب صومك عن شراب وطعام
الصوم صوم الجوارح كلها مجمله
يا لله يا لله يا محيي رميم العظام
نرفع لك اقلوبنا ودموعنا مرسله
نطلبك توفيق للطاعة وزود انتظام
واجعل شهرنا علينا مبتدأ مرحلة
ونطلبك يا رب حسن العاقبة والختام
يارب واجعل صلاة العبد عندك صله
ونطلبك رحماك وعبادك اصيامٍ اقيام
اللي يعيش إقبله واللي يموت إقبله
راجح المغيري